Kanada hökuməti Rusiya yığmasının 2027-ci ildə gənclər arasında keçiriləcək buzüstü hokkey üzrə dünya çempionatına qatılmasına qarşı çıxıb. Turnir 2026-cı il dekabrın 26-dan 2027-ci il yanvarın 5-dək Kanadanın Alberta əyalətində təşkil olunacaq.
“The Canadian Press” agentliyinin məlumatına görə, bu barədə Kanadanın idman məsələləri üzrə dövlət katibi Adam van Kuverden açıqlama verib.
O bildirib ki, Rusiya və Belarusdan olan hokkeyçilərin, eləcə də rəsmi şəxslərin ölkəyə giriş müraciətlərinə fərdi qaydada baxılacaq. Məhdudiyyətlər artıq etibarlı Kanada vizasına sahib şəxslərə də şamil ediləcək.
Kanada CAS-ın qərarına baxmayaraq mövqeyini dəyişmir
Oktyabrın sonunda İdman Arbitraj Məhkəməsi (CAS) Beynəlxalq Buzüstü Hokkey Federasiyasının (IIHF) Rusiya yığmalarını beynəlxalq yarışlara qaytarması ilə bağlı qərar qəbul edib.
Bununla belə, Kanada hökuməti Ukraynada müharibə davam etdiyi müddətdə Rusiya və Belarus komandalarının ölkə ərazisində öz milli bayraqları altında yarışmasına icazə vermək istəmir.
Kanada rəsmilərinin mövqeyi Rusiya yığmasının qarşıdakı dünya çempionatında iştirakını ciddi sual altına qoyur. Beynəlxalq idman qurumlarının qərarlarına baxmayaraq, turnirə ev sahibliyi edən ölkə giriş məhdudiyyətlərini tətbiq etmək niyyətindədir.
