43 yaşlı amerikalı əfsanəvi sabiq tennisçi, 23 qat Grand Slam qalibi Serena Williams bildirib ki, çəkisinə nəzarət etmək üçün GLP-1 peptidinə əsaslanan “Zepbound” preparatından istifadə edir.
Onun sözlərinə görə, bədən quruluşu ilə bağlı həm mənfi, həm də müsbət rəylər eşitməsinə baxmayaraq, artıq başqalarının nə dediyi onun üçün önəmli deyil:
“Əsas məsələ şəffaflıqdır. Mənim HBO-dakı sənədli filmimdə məşqçim deyir: ‘Sən arıqlamalısan’. Amma ilk övladımı – Olimpiya dünyaya gətirdikdən sonra bu inanılmaz dərəcədə çətin idi. Hər gün kortda idim, super-idmançı kimi çalışırdım, amma heç nə kömək etmirdi.”
Williams bildirib ki, həmişə idman zalında çalışıb, qaçıb, rəqs edib, sağlam həyat tərzi sürüb, lakin istədiyi səviyyəyə enə bilməyib. Buna görə də “Ro” vasitəsilə GLP-1 terapiyasına başlamalı olub: “Mən bunu yüngül yanaşaraq demirəm, sadəcə mövzunu açıq danışmaq vacibdir. Mən iki qızın anasıyam və onların qarşısında dürüst olmaq istəyirəm ki, onlar da mənimlə dürüst ola bilsinlər.”
Serena əlavə edib ki, bu, bir çox qadının yaşadığı problemdir: idmanla məşğul olur, düzgün qidalanır, amma hədəfə çata bilmir. Preparat isə ona özünü daha yüngül, seksual və inamlı hiss etməyə kömək edib.
Qidalanmasından danışan ulduz tennisçi ət yemədiyini, karbohidratları çox sevdiyini, gündəlik zülal ehtiyacını isə əsasən qara lobya və pinto ilə qarşıladığını vurğulayıb.
“GLP-1 ətrafında çoxlu stiqma var. Deyirlər: ‘Bu, tənbəllər üçündür’, ya da ‘Çox işləsən, ehtiyacın olmaz’. Amma mən öz təcrübəmdən bilirəm ki, bu, sadəcə yalandır. Bəzən köməyə ehtiyac olur. Hər kəsin hekayəsi özünəməxsusdur və bu seçimi etmək normaldır. Mən etdim və çox razıyam.”
