2026-cı il dünya çempionatı dramatik və gərgin final qarşılaşması ilə başa çatdı. Nyu-Cersi ştatındakı New York/New Jersey Stadiumda keçirilən həlledici oyunda İspaniya millisi son dünya çempionu Argentinanı əlavə vaxtda 1:0 hesabı ilə məğlub edərək tarixində ikinci dəfə planetin ən güclü komandası adına sahib çıxdı. Qələbə qolunu matçın 106-cı dəqiqəsində meydana sonradan daxil olan Ferran Torres vurdu.
Turnir bütövlükdə yüksək təşkilatçılığı, dolu tribunaları və möhtəşəm atmosferi ilə yadda qaldı. Üç ev sahibi ölkədə keçirilən oyunlar ərzində ciddi təşkilati problemlər qeydə alınmadı. Azarkeşlər həm stadion şoularını, həm də yeni texnologiyaların tətbiqini maraqla izlədilər. Bununla yanaşı, mundial mübahisəli hakim qərarları və bir neçə qalmaqallı epizodla da diqqət çəkdi. Ən böyük fərdi mübarizə isə bombardir yarışında yaşandı. Üçüncü yer uğrunda görüşdə Kilian Mbappe rekordunu yeniləyərək Lionel Messini geridə qoymuşdu və argentinalı ulduzun finalda buna cavab verməsi gözlənilsə də, o, fərqlənə bilmədi.
İspaniyanın üstünlüyü, Argentinanın müdafiə planı
Luis de la Fuentenin komandası oyuna daha fəal başladı və topa nəzarətdə üstünlük qazandı. Lamin Yamal, Dani Olmo və Mikel Oyarzabal hücumlarda fəallıq göstərsələr də, Emiliano Martines etibarlı çıxışı ilə hesabın açılmasına imkan vermədi. Argentina isə ilk dəqiqələrdən fiziki mübarizəyə üstünlük verdi və meydanın mərkəzində rəqibin oyun ritmini pozmağa çalışdı.
İlk hissədə təhlükəli epizodlar az olsa da, gərginlik bir an belə azalmadı. Lionel Messi cərimə zərbəsindən təhlükə yaratmağa çalışdı, Yamalın cinah reydləri isə ispanların əsas hücum silahına çevrildi. Fasiləyə az qalmış Lisandro Martines zədələndiyi üçün meydanı tərk etdi və onu Nikolas Otamendi əvəzlədi.
İkinci hissədə də oyunun ssenarisi dəyişmədi. İspaniya topa sahib olur, Argentina isə sıx müdafiə ilə rəqibini dayandırmağa çalışırdı. Ferran Torresin baş zərbəsini Martines dəf etdi, Pedri və Pau Kubarsinin uzaq məsafədən zərbələri də nəticəsiz qaldı. Lionel Skaloni müdafiəni gücləndirmək üçün ardıcıl dəyişikliklər etdi və Lautaro Martinesi meydana buraxmadı. Bu isə komandanın əsas məqsədinin oyunu əlavə vaxta çatdırmaq olduğunu göstərirdi.
Matçın dönüş nöqtəsi əsas vaxtın sonlarında yaşandı. Enso Fernandes Pau Kubarsiyə qarşı kobud oyuna görə ikinci sarı vərəqəni aldı və Argentina 90+3-cü dəqiqədən etibarən 10 nəfərlə mübarizə aparmağa məcbur oldu. Buna baxmayaraq, Emiliano Martines və müdafiə xətti hesabı qorumağı bacardı.
Ferran Torres dünya çempionluğunu gətirdi
Əlavə vaxtda İspaniyanın təzyiqi daha da artdı. Nico Uilyamsın başla ötürməsindən sonra Ferran Torres 106-cı dəqiqədə topu yaxın məsafədən tora göndərərək finalın taleyini həll etdi. Bundan sonra Argentina irəli atıldı. Torres daha bir dəfə fərqlənsə də, ofsayd səbəbindən qol qeydə alınmadı. Messi isə uzaq məsafədən möhtəşəm zərbə ilə hesabı bərabərləşdirməyə yaxın olsa da, top qapının üstündən keçdi.
Son dəqiqələrdə Argentina standart vəziyyətlərdən təhlükə yaratmağa çalışdı, lakin Senesi və Simeonenin cəhdləri nəticəsiz qaldı. Final fitindən sonra İspaniya tarixində ikinci dəfə dünya çempionu titulunu rəsmiləşdirdi, Argentina isə ardıcıl ikinci dünya çempionluğunu qazana bilmədi. Statistik göstəricilər də ispanların üstünlüyünü tam əks etdirdi: zərbələrdə 20:2, gözlənilən qol (xG) göstəricisində isə 1,72-yə qarşı 0,09 üstünlük məhz Avropa təmsilçisinin tərəfində oldu.
Dünya Çempionatı – Final
İspaniya – Argentina – 1:0
Qol: Ferran Torres, 106.
Xəbərdarlıqlar: Lisandro Martines, 41; Paredes, 52; Enso Fernandes, 83; Aleksis Mak Allister, 112.
Qırmızı vərəqə: Enso Fernandes, 90+3 (ikinci sarı vərəqə).
İspaniya: Unai Simon – Kukurelya, Laport (Erik Qarsiya, 99), Kubarsi, Pedro Porro – Fabian Ruis (Pedri, 62), Rodri (Subimendi, 99) – Aleks Baena (Niko Uilyams, 75), Dani Olmo (Merino, 75), Lamin Yamal – Mikel Oyarzabal (Ferran Torres, 62).
Argentina: Emiliano Martines – Talyafiko, Lisandro Martines (Otamendi, 44), Kristian Romero (Medina, 71), Montiel (Molina, 58) – Niko Qonsales (Paredes, 46), Enso Fernandes, Aleksis Mak Allister, Rodrigo De Paul (Simeone, 71) – Xulian Alvares (Senesi, 102), Lionel Messi.
