Portuqaliya millisinin və Səudiyyə Ərəbistanının “Əl-Nəsr” klubunun hücumçusu Kriştiano Ronaldo futbolçu karyerasının sonuna yaxınlaşdığını etiraf edib. 41 yaşlı ulduz 2026/27 mövsümünün onun peşəkar futboldakı son mövsümü ola biləcəyini bildirib. Ronaldo hələ yekun qərarını açıqlamasa da, karyerasını başa vurmaq ehtimalının yüksək olduğunu gizlətməyib.
“Bilmirəm, özüm də bu suala cavab axtarıram. Ola bilsin ki, bu, karyeramda sonuncu mövsüm olacaq. Sonuncu oyunumun vaxtını dəqiqləşdirəndə hamıya məlumat verəcəyəm”, – deyə portuqaliyalı hücumçu gələcəyi ilə bağlı danışarkən bildirib.
Ronaldo daha əvvəl də cari mövsümün böyük ehtimalla futbolda son ili olacağını və karyerasını xüsusi iz buraxaraq başa vurmaq istədiyini söyləmişdi. Onun “Əl-Nəsr”lə hazırkı müqaviləsi 2027-ci ilin yayına qədər qüvvədədir.
Ronaldo 1000-ci qolunu vurmaq istəyir
Portuqaliyalı futbolçunun karyerasının son mərhələsində əsas hədəflərindən biri rəsmi oyunlarda 1000 qol həddinə çatmaqdır. Ronaldo bunun məcburi məqsəd olmadığını vurğulasa da, tarixi göstəriciyə çatmağı çox istədiyini bildirib.
Hazırda onun klub və milli komanda səviyyəsində vurduğu qolların ümumi sayı 979-a çatıb. Beləliklə, 1000 qol üçün Ronaldoya daha 21 dəfə fərqlənmək lazımdır.
Ronaldo 2026-cı il dünya çempionatının onun son mundialı olduğunu təsdiqləsə də, Portuqaliya millisindəki karyerasını hələ başa vurmayıb. Hücumçu yeni baş məşqçi Jorje Jezusun UEFA Millətlər Liqasının qarşıdakı oyunları üçün açıqladığı heyətə də daxil edilib.
