“Mançester Siti” Erlinq Holandı sata bilər: transfer qiyməti açıqlandı

İngiltərənin “Mançester Siti” klubu norveçli ulduz hücumçusu Erlinq Holandla yollarını ayırmaq ehtimalını nəzərdən keçirir. Komandanın əsas qol silahlarından biri olan futbolçunun gələn yay transfer bazarına çıxarılması mümkün variantlar arasında göstərilir.

Məlumata görə, klub rəhbərliyinin bu ehtimalı dəyərləndirməsi “Mançester Siti”yə qarşı tətbiq oluna biləcək sanksiyalarla bağlı qeyri-müəyyənlikdən qaynaqlanır. Bununla belə, Holandın satılması barədə yekun qərarın qəbul edildiyi açıqlanmayıb.

Holandın mümkün transfer qiyməti nə qədərdir?

İddialara əsasən, İngiltərə təmsilçisi norveçli hücumçunun 2027-ci ilin yayında komandadan ayrılacağı təqdirdə onun transferindən təxminən 175 milyon avro gəlir götürməyi planlaşdırır.

Bu məbləğ təxminən 327 milyon manata bərabərdir. Beləliklə, mümkün transfer reallaşarsa, “Mançester Siti” Holandın satışından onu heyətinə qatmaq üçün ödədiyi vəsaitdən xeyli yüksək məbləğ əldə edə bilər.

Norveçli hücumçunun mümkün ayrılığı ilə bağlı xəbərlər klubun maliyyə qaydalarının pozulması üzrə işi fonunda gündəmə gəlib. Premyer Liqanın müstəqil komissiyası “Mançester Siti”nin maliyyə qaydalarını pozduğunu müəyyən edib. Klub qərardan apellyasiya şikayəti verib və mümkün sanksiyalarla bağlı yekun proses hələ tamamlanmayıb.

Erlinq Holand 2022-ci ilin yayında Dortmund “Borussiya”sından 60 milyon avro qarşılığında İngiltərə klubuna transfer olunub. Hücumçu qısa müddətdə komandanın əsas futbolçularından birinə çevrilib.

2025-ci ilin yanvarında norveçli ulduz “Mançester Siti” ilə uzunmüddətli müqavilə imzalayıb. Yeni razılaşmaya əsasən, onun klubla sözləşməsi 2034-cü ilin yayına qədər qüvvədədir.

Əlaqəli Məqalələr

Şərhlər

Məqaləni Paylaş

Son Rəylər

Xəbər Bülleteni