Azərbaycan I Liqasında IV turun növbəti qarşılaşması keçirilib. Binə qəsəbə stadionunda çempionluğa iddialı iki kollektiv – “Səbail” və “Karvan-Yevlax” üz-üzə gəlib. Gərgin mübarizə şəraitində keçən oyunda qalib müəyyənləşməyib və komandalar hərəyə bir xal qazanıblar.
Meydan sahibləri görüşə sürətli başlayaraq hesabı erkən açıblar. Lakin ikinci hissədə qonaqlar tarazlığı bərpa etməyi bacarıb və matç 1:1 hesabı ilə başa çatıb. Bu nəticədən sonra “Şahdağ Qusar” 12 xalla turnir cədvəlinin lideri olaraq qalır.
Tur davam edir
IV turun ilk oyununda “Şahdağ Qusar” doğma meydanda “Zaqatala”nı 6:0 hesabı ilə məğlub etmişdi. Turun qalan qarşılaşmaları yaxın günlərdə baş tutacaq.
Oktyabrın 9-da MOİK “Mingəçevir”i, “Şimal” isə “Xankəndi”ni qəbul edəcək. Turun son oyunu isə oktyabrın 10-da “Gəncəbasar” və “Baku Sportinq” komandaları arasında keçiriləcək.
İlk turların nəticələri göstərir ki, I Liqada liderlik uğrunda mübarizə kifayət qədər gərgin keçir və hər xal turnir cədvəlində mühüm rol oynayır.
Azərbaycan I Liqası, IV tur
8 oktyabr
“Səbail” – “Karvan-Yevlax” 1:1
- Qollar: A.Qomes Soares, 7 – E.Sillas, 61.
- Hakimlər: Emin Əliyev, Mirnihat Seyidov, Zakir Şükürzadə, Alik Yunusov.
- Hakim-inspektor: İmanxan Sultani.
- AFFA nümayəndəsi: Seymur Səlimli.
- Stadion: Binə qəsəbə stadionu.
