Mayın 23-də boks dünyasının diqqəti Misirin Giza şəhərinə yönələcək. Ağır çəkidə WBC, WBA və IBF kəmərlərinin sahibi Aleksandr Usik niderlandlı kikboksinq ulduzu Riko Verhoven ilə üz-üzə gələcək. Qarşılaşma rəsmi olaraq təsdiqlənib və böyük maraq doğurur.
Mütəxəssislərin böyük əksəriyyəti bu döyüşdə ukraynalı boksçunu açıq favorit hesab edir. Usikin peşəkar boks təcrübəsi, taktiki hazırlığı və yüksək ring intellekti ona üstünlük qazandıran əsas amillər kimi göstərilir.
Aleksandr Usik son döyüşünü 2025-ci ilin iyulunda keçirib. O, britaniyalı Daniel Dübuanı revanş qarşılaşmasında beşinci raundda nokaut edərək ikinci dəfə ağır çəkidə mütləq dünya çempionu olub. Daha sonra isə WBO kəmərindən könüllü şəkildə imtina edib.
Verhovenin təcrübəsi diqqət çəkir
Riko Verhoven uzun illər kikboksinq dünyasının ən dominant idmançılarından biri sayılıb. Niderlandlı döyüşçü “Glory” təşkilatında 11 ildən çox ağır çəkidə çempion titulunu qoruyub və rekord sayda titul döyüşü qazanıb.
37 yaşlı idmançının statistikası:
- 76 döyüş
- 66 qələbə
- 21 nokaut
- 10 məğlubiyyət
Verhoven son görüşündə rusiyalı Artem Vaxitovu məğlub edərək titulunu qoruyub. Bundan sonra isə kikboksinq təşkilatı ilə yollarını ayırıb.
Bununla yanaşı, Verhoven tamamilə boksdan uzaq idmançı hesab edilmir. Onun peşəkar boks qaydaları ilə də bir qarşılaşması olub və həmin döyüşdə qalib gəlib. Lakin ekspertlər bildirirlər ki, Usik səviyyəsində rəqiblə qarşılaşmaq tamamilə fərqli sınaqdır.
Döyüşün taleyini təcrübə həll edə bilər
39 yaşlı Usik son illərdə Tayson Fyuri, Entoni Coşua və Daniel Dübuа kimi rəqiblərlə keçirdiyi döyüşlərdə yüksək səviyyəsini qoruyub saxlayıb. Analitiklər hesab edir ki, ukraynalı boksçunun sürəti, ayaq işi və müdafiə bacarığı bu görüşdə əsas üstünlük olacaq.
Ekspertlərin fikrincə, Verhoven fiziki gücü və sərt zərbələri ilə təhlükə yarada bilər. Ancaq peşəkar boks təcrübəsi və uzun raundlarda döyüş ritmini saxlamaq baxımından Usik daha hazırlıqlı görünür.
Bir çox idman şərhçiləri qarşılaşmanın texniki baxımdan maraqlı keçəcəyini və Usikin xal üstünlüyü və ya gec raundlarda texniki nokautla qalib gələcəyini proqnozlaşdırır.
