Formula 1 üzrə 2026-cı il mövsümünün 11-ci mərhələsi olan Macarıstan Qran-prisi 24–26 iyul tarixlərində Budapeşt yaxınlığındakı Hunqarorinq trasında keçiriləcək. Bu yarış eyni zamanda yay fasiləsindən əvvəl son mərhələ olacaq və komandalar mövsümün ilk hissəsini uğurlu nəticə ilə başa vurmağa çalışacaqlar. Çempionluq uğrunda mübarizədə “Mercedes” və “Ferrari” arasındakı rəqabət daha da qızışıb. Hunqarorinqdə ötmələrin çətin olması səbəbindən sıralama turunun nəticəsi həmişə olduğu kimi bu dəfə də həlledici əhəmiyyət daşıyacaq.
İlk on mərhələdən sonra Kimi Antonelli pilotlar çempionatına liderlik edir və “Mercedes” konstruktorlar arasında üstün mövqeyini qoruyur. Bununla belə, “Ferrari”, “McLaren” və “Red Bull”un Budapeştdə ciddi rəqabət göstərəcəyi gözlənilir.
Yarışın proqramı və Hunqarorinq haqqında əsas məlumatlar
Sessiyaların cədvəli (Bakı vaxtı):
24 iyul, cümə
- Birinci sərbəst yürüş – 14:30
- İkinci sərbəst yürüş – 18:00
25 iyul, şənbə
- Üçüncü sərbəst yürüş – 13:30
- Sıralama turu – 17:00
26 iyul, bazar
- Yarış – 16:00
Hunqarorinq trasının əsas göstəriciləri:
- Məkan: Moqyorod, Macarıstan
- Dövrənin uzunluğu: 4,381 km
- Yarış məsafəsi: 70 dövrə (306,63 km)
- Döngələrin sayı: 14
- Yarış rekordu: 1:16.627 – Lüis Hemilton (2020)
- Keçənilki qalib: Lando Norris (“McLaren”, 2025)
2026 mövsümündə tətbiq edilən yeni aktiv aerodinamika sistemi Macarıstanda da istifadə olunacaq. Pilotlar döngələrdə daha yüksək yerəbasma qüvvəsi, düzlük hissələrdə isə maksimal sürət rejimindən yararlana biləcəklər. Ənənəvi DRS sistemi artıq ləğv olunub və onu ötmə zamanı əlavə elektrik gücü verən yeni OverTake rejimi əvəz edib.
Hava və strategiya həlledici rol oynaya bilər
Sinoptiklərin son proqnozuna əsasən, cümə və şənbə günləri hava əsasən quru və günəşli olacaq. Temperatur cümə günü 26 dərəcəyə, şənbə günü isə 29 dərəcəyə qədər yüksələcək. Bazar günü yarış vaxtı havanın 32 dərəcəyədək isinməsi gözlənilir. Gün ərzində təxminən 40 faiz yağış ehtimalı olsa da, əsasən yarışdan sonra yağıntı gözlənilir.
Bu mərhələdə komandaların ixtiyarına Pirelli-nin ən yumşaq tərkibli C3, C4 və C5 şinləri veriləcək. Hunqarorinq dar və texniki tras olduğundan təkərlərin həddindən artıq qızmasının qarşısını almaq, düzgün pit-stop strategiyası seçmək və hibrid güc qurğusunun enerjisini səmərəli idarə etmək qələbə uğrunda mübarizədə əsas amillərdən biri olacaq. Asfaltın həftəsonu ərzində tədricən rezinlə örtülməsi səbəbindən trasın tutumu da sessiyadan sessiyaya yaxşılaşacaq.
