Argentina millisinin kapitanı və ABŞ-ın “İnter Mayami” klubunun hücumçusu Lionel Messi ilə bağlı İspaniyada yeni müzakirələr başlayıb. 2026-cı il “Asturiya Şahzadəsi” İdman Mükafatının laureatı olan futbolçunun bu mükafatdan məhrum edilməsi tələbi ilə bir sıra müraciətlər edilib.
İspaniya mətbuatının yaydığı məlumata görə, Change.org platforması vasitəsilə Asturiya Şahzadəsi Fonduna ümumilikdə 30 petisiya təqdim olunub. Müraciət müəllifləri iddia edirlər ki, Messi 2026-cı il dünya çempionatının İspaniyaya qarşı keçirilən final oyununda və qarşılaşmadan sonrakı mükafatlandırma mərasimində idman etikası prinsiplərinə uyğun davranmayıb. Onların fikrincə, Argentina millisinin kapitanı kimi futbolçu nümunəvi davranış sərgiləməli idi və buna görə də mükafatın geri alınması bu nüfuzlu ada olan etimadı qoruyacaq.
FIFA araşdırma aparır
Məlumatda bildirilir ki, FIFA da final qarşılaşmasından sonra baş verdiyi iddia olunan insidentlə bağlı intizam araşdırmasına başlayıb. Hazırda araşdırmanın nəticələri açıqlanmayıb və hər hansı yekun qərar qəbul edilməyib.
Messi 2026-cı ildə bu nüfuzlu beynəlxalq mükafata 12 ölkədən irəli sürülən 27 namizədi geridə qoyaraq layiq görülmüşdü. Mükafat onun uzunmüddətli idman nailiyyətləri və futbola verdiyi töhfələr nəzərə alınaraq təqdim edilmişdi.
Karyerası ərzində argentinalı ulduz 8 “Qızıl top”, “Barselona” ilə 10 İspaniya çempionluğu, 4 UEFA Çempionlar Liqası titulu, “PSJ” ilə isə 2 Fransa çempionluğu qazanıb. O, həmçinin Argentina millisi ilə 2022-ci il dünya çempionu və 2008-ci il Pekin Olimpiadasının qalibi olub. Hazırda nə Fond, nə də futbolçunun nümayəndələri petisiyalarla bağlı rəsmi mövqe açıqlamayıblar.
