2027-ci ildə keçiriləcək İspaniya Superkubokunun məkanı və oyun tarixləri rəsmən təsdiqlənib. İspaniya Kral Futbol Federasiyasının qərarına əsasən, turnir gələn ilin fevral ayında Türkiyənin İstanbul şəhərində təşkil olunacaq. Bu qərarla Superkubok uzun illərdən sonra ilk dəfə Səudiyyə Ərəbistanından kənarda keçiriləcək.
Turnir fevralın 2-dən 7-dək davam edəcək və ənənəvi “Final Four” formatında baş tutacaq. Yarımfinal görüşlərində “Real Sosyedad” Madrid “Real”ı ilə, “Barselona” isə Madrid “Atletiko”su ilə üz-üzə gələcək. Hər iki cütün qalibləri fevralın 7-də keçiriləcək final matçında kubok uğrunda mübarizə aparacaqlar.
Atatürk Olimpiya Stadionu növbəti böyük turnirə hazırlaşır
Bütün qarşılaşmaların İstanbulun Atatürk Olimpiya Stadionunda keçirilməsi planlaşdırılır. Avropanın ən tanınmış arenalarından sayılan stadion daha əvvəl 2005 və 2023-cü illərdə UEFA Çempionlar Liqasının finalına ev sahibliyi edib. Yeni qərarla Türkiyə daha bir nüfuzlu beynəlxalq futbol tədbirini qəbul edəcək.
Son illərdə İspaniya Superkuboku əsasən Səudiyyə Ərəbistanında təşkil olunurdu. Lakin 2027-ci ildə həmin ölkənin Asiya Kubokuna ev sahibliyi etməsi səbəbindən yarış üçün alternativ məkan seçilib. Federasiya bildirib ki, turnirin Türkiyədə keçirilməsi beynəlxalq təqvimlə bağlı zərurətdən irəli gəlir və Superkubokun dünya futbolunda artan nüfuzunu qorumağa xidmət edir. Hazırkı plana əsasən, yarışın 2028-ci ildən etibarən yenidən Səudiyyə Ərəbistanına qayıtması nəzərdə tutulur.
