İtaliyanın “Roma” klubu 19 yaşlı portuqaliyalı yarımmüdafiəçi Rodriqu Moranın transferindən sonra futbol tarixində qeyri-adi göstəriciyə nail olub. “Portu”dan gələn gənc futbolçunun seçdiyi forma nömrəsi paytaxt təmsilçisinə tarixi rekord qazandırıb.
Mora yeni komandasında 86 nömrəli formanı geyinəcək. Məhz bu rəqəm “Roma” tarixində indiyədək əsas komandada istifadə edilməyən son nömrə idi. Beləliklə, klub tarixində 1-dən 99-a qədər bütün forma nömrələri ən azı bir dəfə futbolçular tərəfindən istifadə olunub. “Roma”nın buna nail olan ilk klub olduğu bildirilir.
Gənc portuqaliyalı “Portu”da da 86 nömrəli forma ilə çıxış edib. Onun transferinin təxminən 27 milyon avroya başa gəldiyi bildirilir. Mora ötən mövsümlərdə Portuqaliya klubunun əsas komandasında 50-dən çox matça çıxıb.
“Roma”da qeyri-adi forma nömrələri
İtaliya futbolunda yüksək forma nömrələrinin istifadəsi uzun illərdir geniş yayılıb və “Roma” da bu ənənənin ən diqqətçəkən nümunələrindən biridir.
Müxtəlif dövrlərdə Romelu Lukaku 90, Stefan El-Şaaravi 92, qapıçı Mile Svilar isə 99 nömrəli forma ilə meydana çıxıb. Klub tarixinin simvolu Françesko Totti isə karyerası boyunca 10 nömrə ilə xüsusi olaraq yadda qalıb.
Tottinin 2017-ci ildə futbolçu karyerasını başa vurmasından sonra “Roma”da 10 nömrəli forma başqa oyunçuya verilməyib. Bununla belə, klub həmin nömrənin rəsmi olaraq istifadədən çıxarıldığını elan etməyib.
Rodriqu Moranın 86 nömrəni seçməsi isə “Roma”nın forma nömrələri tarixində qalan son boşluğu doldurub. Bununla da İtaliya təmsilçisi 1-dən 99-a qədər bütün rəqəmlərin istifadə edildiyi unikal göstəriciyə çatıb.
