İsveçrənin Bazel şəhərində keçirilən ATP 500 kateqoriyalı tennis turnirində finala yüksələn iştirakçılar bəlli olub. Sərt örtüklü kortlarda təşkil olunan yarışın həlledici görüşündə monakolu Valentin Vaşero və çexiyalı İrji Leheçka üz-üzə gələcəklər.
Yarımfinal mərhələsində Vaşero amerikalı Teylor Fritsi iki setdə məğlub edib. Leheçka isə almaniyalı Yan-Lennard Ştruff üzərində üç setlik qələbə qazanaraq finala vəsiqə əldə edib.
Vaşero ikinci, Leheçka isə doqquzuncu finalına yüksəldi
ATP reytinqində 31-ci pillədə qərarlaşan Valentin Vaşero turnirin altıncı nömrəli iştirakçısı, dünyanın 13-cü raketkası Teylor Fritsi 7:6, 6:3 hesabı ilə üstələyib.
Monakolu tennisçi ilk setdə gərgin tay-brekdən qalib ayrılıb, ikinci hissədə isə üstünlüyünü qoruyaraq qarşılaşmanı qələbə ilə tamamlayıb.
Bu nəticə Vaşeronun ATP reytinqinin ilk 20-liyində yer alan rəqiblər üzərində 10-cu qələbəsi olub. O, karyerasında ikinci dəfə finala yüksəlib. Tennisçinin ilk finalı 2025-ci ildə Şanxayda keçirilən Masters turnirində baş tutub və həmin yarışda çempion adını qazanıb.
İrji Leheçka isə Yan-Lennard Ştruffa qarşı ilk seti 3:6 hesabı ilə uduzsa da, sonrakı iki setdə 7:5 və 6:4 hesabları ilə qalib gəlib.
Çexiyalı tennisçi bununla karyerasının 9-cu, cari mövsümün isə 3-cü finalına vəsiqə qazanıb. Ştruff üzərindəki qələbə onun mövsümdə 40-cı uğuru olub.
Leheçka və Ştruff bu qarşılaşmayadək iki dəfə üz-üzə gəlmişdilər. Əvvəlki görüşlərdə hesab 1:1 idi.
ATP 500, Bazel. Sərt örtük, 1/2 final
İrji Leheçka [8] – Yan-Lennard Ştruff [SE] – 3:6, 7:5, 6:4
Valentin Vaşero – Teylor Frits [6] – 7:6 (7:5), 6:3
Final
Valentin Vaşero – İrji Leheçka [8]
