“Barselona” yay transfer pəncərəsində heyətinə daha bir futbolçu cəlb edib. Kataloniya klubu “Fənərbaxça”nın və Xorvatiya millisinin qapıçısı Dominik Livakoviçin transferi ilə bağlı bütün sənədləri rəsmiləşdirib.
31 yaşlı qolkiper üçün Türkiyə təmsilçisinə ilkin olaraq 2 milyon avro ödəniləcək. Müqavilədə nəzərdə tutulan bonusların reallaşacağı halda transferin ümumi məbləği daha 2 milyon avro arta bilər. Beləliklə, sövdələşmənin dəyəri 4 milyon avroya çata bilər.
Livakoviç üçün ilkin plan dəyişə bilər
Transferlə bağlı ilkin plana əsasən, “Barselona” Livakoviçi 2026/27 mövsümü üçün başqa kluba icarəyə göndərmək və 2027-ci ilin yayında geri qaytarmaq niyyətində idi. Buna səbəb Voytsex Şensnının müqaviləsinin 2027-ci ilin iyununda başa çatmasıdır. Xorvatiyalının gələcəkdə Joan Qarsiyanın əsas əvəzedicilərindən biri olması nəzərdə tutulurdu.
Lakin avqustun 25-də yayılan daha yeni məlumatlarda Kataloniya klubunun planını dəyişərək Livakoviçi dərhal əsas komandaya cəlb edə biləcəyi bildirilir. Bu ssenaridə o, Joan Qarsiyanın ehtiyat qapıçısı olacaq, Şensnı isə qapıçı seçimində daha geriyə düşəcək.
Livakoviç 2023-cü ildə Zaqreb “Dinamo”sundan “Fənərbaxça”ya keçib. O, xüsusilə Xorvatiya millisinin 2022-ci il dünya çempionatında bürünc medal qazanmasında göstərdiyi oyunla diqqət mərkəzinə düşmüşdü.
Qapıçı ötən mövsüm icarə əsasında “Jirona” və Zaqreb “Dinamo”sunun heyətində olub. İndi isə onun karyerasında “Barselona” mərhələsi başlayır.
