US Open 2026-nın kişilər arasında fərdi yarışında ilk yarımfinal cütü müəyyənləşib. Finala vəsiqə uğrunda iki amerikalı tennisçi – Ben Şelton və Frensis Tiafo mübarizə aparacaq.
Dünyanın 9-cu raketkası Şelton 1/4 finalda turnirin son çempionu Karlos Alkarası gərgin beşsetlik qarşılaşmada mübarizədən kənarlaşdırıb. Amerikalı 4 saat 28 dəqiqə davam edən görüşdə 6:7 (5:7), 6:1, 6:3, 1:6, 7:6 (10:7) hesabı ilə qalib gəlib.
Qarşılaşma yerli vaxtla saat 23:05-də başlayıb və 03:33-də başa çatıb. Bununla da Şelton US Open tarixində ən gec yekunlaşan matçın iştirakçılarından biri olub. O, həmçinin “Böyük Dəbilqə” turnirində Alkarası məğlub edən ilk amerikalı tennisçi olub.
Tiafo iki setlik geridönüş etdi
Digər 1/4 finalda Frensis Tiafo Aleks Mikelsenlə qarşılaşıb. İlk iki seti uduzan 28 yaşlı amerikalı möhtəşəm geridönüş edərək 4 saat 39 dəqiqəlik mübarizədən qalib ayrılıb – 5:7, 3:6, 7:5, 6:3, 7:6 (10:6).
Mikelsen üçüncü setdə matçı qazanmağa yaxın olsa da, Tiafo dönüş etməyi bacarıb. Beləliklə, o, karyerasında üçüncü dəfə “Böyük Dəbilqə” turnirinin yarımfinalına yüksəlib. Maraqlıdır ki, Tiafonun hər üç yarımfinalı məhz US Open-də olub – 2022, 2024 və 2026-cı illərdə.
Şelton isə Nyu-Yorkda ikinci dəfə yarımfinala vəsiqə qazanıb. O, ilk dəfə 2023-cü ildə US Open-də bu mərhələyə çatmışdı. Ümumilikdə bu, 23 yaşlı tennisçinin “Böyük Dəbilqə” turnirlərində üçüncü yarımfinalıdır.
Şelton və Tiafonun yarımfinal qarşılaşması sentyabrın 11-də keçiriləcək. Qalib US Open 2026-nın həlledici görüşünə yüksələcək.
US Open 2026, 1/4 final
- Frensis Tiafo [11] – Aleks Mikelsen – 5:7, 3:6, 7:5, 6:3, 7:6 (10:6)
- Ben Şelton [8] – Karlos Alkaras [2] – 6:7 (5:7), 6:1, 6:3, 1:6, 7:6 (10:7)
