Azərbaycanın “LANDAU Lions” basketbol komandası 2026/2027 mövsümündə avrokuboklarda ilk oyununu keçirib. Təmsilçimiz FIBA Çempionlar Liqasının təsnifat mərhələsində Latviyanın “VEF Riqa” klubu ilə qarşılaşıb.
Bolqarıstanın Samokov şəhərində keçirilən görüş Riqa təmsilçisinin 105:88 hesablı qələbəsi ilə yekunlaşıb. Beləliklə, “LANDAU Lions” Çempionlar Liqasının əsas mərhələsinə vəsiqə uğrunda mübarizəni erkən başa vurub.
“VEF Riqa” növbəti mərhələdə Çexiyanın “Opava” və Polşanın “Dziki Varşava” klubları arasındakı qarşılaşmanın qalibi ilə üz-üzə gələcək.
“LANDAU Lions” Avropa Kubokunda çıxış edəcək
Çempionlar Liqasının təsnifatında məğlubiyyət Azərbaycan klubunun avrokubok mövsümünü başa çatdırmayıb. “LANDAU Lions” mübarizəsini FIBA Avropa Kubokunun əsas mərhələsində davam etdirəcək.
Komanda G qrupunda yer alacaq. “LANDAU Lions”un bu mərhələdəki rəqibləri arasında Danimarkanın “Bakken Bears”, Portuqaliyanın “Benfica” və İsveçrənin “Lions de Genève” klubları var. Qrupun yekun tərkibi Çempionlar Liqasının təsnifatı və FIBA Avropa Kubokunun seçmə mərhələsi başa çatdıqdan sonra tam müəyyənləşəcək.
FIBA Avropa Kubokunun 2026/2027 mövsümündə format da dəyişib. Əsas mərhələdə 48 klub səkkiz qrupa bölünəcək və hər qrupda altı komanda mübarizə aparacaq. Qrup mərhələsinin oyunları oktyabrın 7-də başlayacaq.
