“Çelsi”nin və İngiltərə millisinin futbolçusu Kol Palmer EA SPORTS FC 27-ni nəzərdə tutulan vaxtdan əvvəl canlı yayımda nümayiş etdirdikdən sonra “Twitch” hesabının bloklanması ilə üzləşib.
24 yaşlı futbolçu “Twitch”də bir saatdan artıq davam edən yayım zamanı yeni oyunun görüntülərini göstərib, matçlar oynayıb və Ultimate Team paketlərini açıb. Yayımı minlərlə istifadəçi izləyib.
Problem Palmerin oyuna çıxış əldə etməsi deyil, yayımı müəyyən edilmiş vaxtdan əvvəl başlaması olub. EA SPORTS FC-nin rəsmi hesabı hətta canlı yayımın çatına qoşularaq futbolçuya zarafatla xəbərdarlıq edib:
“Kol, məgər bunu bir qədər sonra etməli deyildik? Biz Böyük Britaniya vaxtı ilə saat 18:00-da canlı yayımda olacağıq!”
Palmer bloklanmaya yumorla reaksiya verdi
Xəbərdarlıqdan bir müddət sonra yayım dayandırılıb, Palmerin “Twitch” hesabı isə bloklanıb. Platformada görünən bildirişdə müəllif hüquqları ilə qorunan məzmunla bağlı məhdudiyyət qeyd olunub. Bununla belə, “Twitch” və EA bloklanmanın müddəti və tətbiq mexanizmi barədə ayrıca rəsmi açıqlama verməyib.
Palmer baş verənlərə sosial şəbəkədə yumorla münasibət bildirib və hesabının açılmasını istəyib:
“Mən sadəcə insanlara istədiklərini verirdim… Məni blokdan çıxarın, zəhmət olmasa”.
Futbolçu daha sonra “Tezliklə qayıdacağıq” mesajını da paylaşıb.
EA SPORTS FC 27-nin tam versiyasının dünya üzrə rəsmi buraxılışı sentyabrın 25-nə planlaşdırılıb. Oyunun müəyyən versiyalarını əvvəlcədən sifariş edən istifadəçilər isə sentyabrın 18-dən erkən giriş imkanı əldə edəcəklər.
Palmer yayım zamanı özünün oyundakı reytinqinə də münasibət bildirib. İngiltərə millisinin üzvünün ümumi göstəricisi əvvəlki 87-dən 85-ə endirilib və futbolçu buna zarafatla etiraz edib.
