Özbəkistanın Səmərqənd şəhərində 46-cı Ümumdünya Şahmat Olimpiadasının əsas yarışlarına start verilir. Azərbaycan həm açıq, həm də qadınlar bölməsində milli komandalarla təmsil olunacaq.
Azərbaycan yığmaları yarışa beş şahmatçıdan ibarət heyətlə qatılıblar. Hər turda isə komandanın dörd üzvü lövhə arxasına keçəcək.
Kişilərdən ibarət Azərbaycan millisinin heyəti:
- Şəhriyar Məmmədyarov
- Rauf Məmmədov
- Aydın Süleymanlı
- Məhəmməd Muradlı
- Eltac Səfərli
Qadınlardan ibarət Azərbaycan millisinin heyəti:
- Ülviyyə Fətəliyeva
- Günay Məmmədzadə
- Gövhər Beydullayeva
- Xanım Balacayeva
- Gülnar Məmmədova
İlk tur sentyabrın 16-da keçiriləcək. Püşkün nəticəsinə əsasən, kişilərdən ibarət Azərbaycan millisi Mərakeş komandası ilə qarşılaşacaq. Qadınlardan ibarət yığmanın ilk rəqibi isə Qvatemala olacaq. Açılış turunda Şəhriyar Məmmədyarov və Ülviyyə Fətəliyeva istirahət edəcəklər.
Səmərqənddə təşkil olunan yarış iştirakçı komandaların sayına görə Şahmat Olimpiadaları tarixində yeni göstərici ilə diqqət çəkir. Açıq bölmədə 208, qadınların yarışında isə 190-dan çox komanda mübarizə aparır. Bununla da 2024-cü ildə Budapeştdə qeydə alınmış əvvəlki rekord geridə qalıb.
Olimpiada İsveçrə sistemi üzrə 11 turdan ibarətdir. Komandaların heyətində beş şahmatçı olsa da, hər qarşılaşmada dörd lövhədə oyun keçirilir. Altıncı turdan sonra, sentyabrın 22-də iştirakçılar üçün istirahət günü nəzərdə tutulub.
Yarış sentyabrın 27-də başa çatacaq
46-cı Ümumdünya Şahmat Olimpiadasının açılış mərasimi sentyabrın 15-də keçirilib. Sonuncu – 11-ci turun oyunları və bağlanış mərasimi sentyabrın 27-də baş tutacaq.
Olimpiada ilə paralel olaraq Səmərqənddə FIDE-nin digər tədbirləri də təşkil olunur. Şəhər əlilliyi olan şahmatçılar arasında III FIDE Olimpiadasına da ev sahibliyi edir. Turnir günlərində FIDE Konqresinin iclasları və təşkilatın seçkiləri də keçiriləcək.
Azərbaycan şahmatçıları 11 tur ərzində komanda medalları ilə yanaşı, ayrı-ayrı lövhələr üzrə fərdi mükafatlar uğrunda da mübarizə aparacaqlar.
