İspaniyada Lionel Messinin sahibi olduğu “Kornelya” ilə Jordi Alba və Tiaqo Alkantaranın “Hospitalet” klubu arasında keçirilən qarşılaşma meydandakı nəticədən çox, final fitindən sonra baş verən insidentlə yadda qalıb.
İspaniya Tercera RFEF-in üçüncü turunda keçirilən Kataloniya derbisində tərəflər 0:0 hesablı heç-heçə ediblər. Qarşılaşma başa çatdıqdan sonra isə azarkeşlərin bir hissəsi arasında qarşıdurma yaranıb.
Məlumata görə, final fitinə az qalmış stadionda “Hospitalet” tərəfdarlarına yerli azarkeşlər arenanı tərk edənədək öz yerlərində qalmaları barədə elan verilib. Buna baxmayaraq, daha sonra iki komandanın tərəfdarları arasında münaqişə başlayıb.
Stul və masalar bir-birinə atılıb
Qarşıdurma qısa müddətdə kütləvi davaya çevrilib. İnsident zamanı təhqirlər səsləndirilib və müxtəlif əşyalar atılıb. “Kornelya” hadisə zamanı hətta stul və masaların atıldığını, nəticədə insanların xəsarət aldığını bildirib.
Hadisədən sonra hər iki klub zorakılığı pisləyən rəsmi açıqlama yayıb. Lakin tərəflərin insidentin necə başladığı ilə bağlı mövqeləri fərqlidir.
“Hospitalet” öz azarkeşlərinin zorakılığa məruz qaldığını bildirib və zərərçəkənlərə dəstəyini ifadə edib. Klub baş verənlərin araşdırılması üçün aidiyyəti qurumlarla əməkdaşlıq edəcəyini açıqlayıb.
Klublar məsuliyyəti bir-birinin üzərinə qoyur
“Kornelya” isə qarşıdurmanın qonaq azarkeşlər üçün ayrılmış sektorda yerləşən şəxslər tərəfindən başladıldığını iddia edib. Klub insidentdə iştirak edənlər arasında əvvəllər başqa komandaların fanat qrupları ilə əlaqəli olmuş və stadionlara girişinə qadağa qoyulmuş şəxslərin ola biləcəyini də ehtimal edib.
Messinin klubu “Hospitalet”i hadisəni törədən şəxslərin müəyyənləşdirilməsinə kömək etməyə çağırıb. Hər iki tərəf hüquq-mühafizə orqanları ilə əməkdaşlığa hazır olduğunu bildirib.
Qarşıdurmanın bütün detalları hələ müəyyənləşdirilmədiyindən, insidentin başlanmasına görə məsuliyyətlə bağlı klubların qarşılıqlı ittihamları onların öz versiyaları olaraq qalır.
