Azərbaycan üzgüçüləri Bakıda keçirilən “İpək Yolu” Dünya Kubokunda uğurlu çıxışlarını davam etdirirlər. Milli komandanın üzvləri Yeqor Maynitski və Anastasiya Boborıkina yarış zamanı yeni Azərbaycan rekordlarına imza atıblar.
Yeqor Maynitski 200 metr məsafəyə qarışıq üsulla üzmədə finişə 2 dəqiqə 03,69 saniyəyə çataraq ölkə rekordunu yeniləyib. Anastasiya Boborıkina isə 100 metr məsafəyə brass üsulu ilə yarışda 1 dəqiqə 15,32 saniyəlik nəticə göstərərək yeni Azərbaycan rekordunun sahibi olub.
Bununla yanaşı, milli komandanın daha bir neçə üzgüçüsü şəxsi göstəricilərini yaxşılaşdırmağı bacarıb.
Azərbaycan üzgüçülərinin yeni nəticələri
- Yeqor Maynitski — 50 metr brass üzrə şəxsi rekord
- Ramal Sadıqlı — 100 metr sərbəst üsul üzrə şəxsi rekord
- Amin Oruclu — 1500 metr sərbəst üsul üzrə şəxsi rekord
- Fərhad Şirməmmədli — 1500 metr sərbəst üsul üzrə şəxsi rekord
Maynitski və Boborıkinanın nəticələri Azərbaycan komandasının turnirdə müəyyənləşdirdiyi ilk ölkə rekordları deyil. Dünya Kubokunun ilk yarış günündə Fatimə Alkərəmova 100 metr qarışıq üsulda 1:05,39 nəticə göstərərək Azərbaycan rekordunu yeniləmişdi.
“İpək Yolu” Dünya Kubokunun Bakı mərhələsi 1-3 oktyabr tarixlərində Su İdmanı Sarayında keçirilir. Turnirdə 44 ölkədən 216 idmançı iştirak edir, Azərbaycan isə yarışda 15 üzgüçü ilə təmsil olunur.
Bakı “İpək Yolu” Dünya Kubokunun ilk mərhələsidir. Yarış seriyasının növbəti mərhələsi 8-10 oktyabrda Daşkənddə, son mərhələsi isə 15-17 oktyabrda Astanada təşkil olunacaq.
