18-ci turun nəticələri
İngiltərə Premyer Liqasının (APL) 18-ci turunda “Vulverhempton” doğma meydanda “Mançester Yunayted”i qəbul etdi. Oyun “Moline” stadionunda keçirildi və meydan sahiblərinin 2:0 hesablı qələbəsi ilə başa çatdı.
Matçın gedişi
47-ci dəqiqədə “Mançester Yunayted”in yarımmüdafiəçisi Brunu Fernandeş qırmızı vərəqə aldı və komandasını azlıqda qoydu. 58-ci dəqiqədə “Vulverhempton”un hücumçusu Mateus Kunya birbaşa künc zərbəsindən hesabı açdı. Oyuna əlavə edilmiş 90+9-cu dəqiqədə isə hücumçu Xvan Hi Çan növbəti qolu vuraraq oyunun nəticəsini müəyyən etdi.
Turnir cədvəlində vəziyyət
Bu qələbə ilə “Vulverhempton” çempionatın turnir cədvəlində 15 xal toplayaraq 17-ci pillədə qərarlaşdı. “Mançester Yunayted” isə 22 xalla 14-cü yerdədir. Çempionata “Liverpul” 39 xalla liderlik edir.
