UEFA Çempionlar Liqasının qalibi olan “Paris Sen-Jermen” yay transfer pəncərəsində heyətini gücləndirməyə davam edir. Komandanın baş məşqçisi Luis Enrike, sabiq komandası “Barselona”dan daha bir futbolçunu komandasında görmək istəyir. Bu dəfə hədəfdə – Gavi.
İspaniyanın nüfuzlu nəşri Mundo Deportivo yazır ki, PSJ 20 yaşlı yarımmüdafiəçi Gavi-nin transferini reallaşdırmaq niyyətindədir. Futbolçunun özü də Fransa klubunun marağını təsdiqləyib, lakin bununla belə, transferin baş tutmayacağını bildirib: “Bəli, maraq var, amma bu baş verməyəcək. Mən sakitəm. ‘Barselona’ həyatımın klubudur. Burada sonsuza qədər qalmaq istəyirəm”, – deyə Gavi vurğulayıb.
Luis Enrike ilə xüsusi münasibətlər
Gavi Luis Enrikeyə böyük hörmət bəslədiyini də gizlətmir. O bildirib ki, məhz bu məşqçi ona İspaniya millisində şans verib və bu qərar onun karyerasında dönüş nöqtəsi olub: “Mənim üçün o, dünyanın ən yaxşı məşqçisidir. O, mənə İtaliyaya qarşı oyunda start heyətində şans verdi. Həmin vaxt tənqid olunurdu, amma qorxmadı. Mən ona çox minnətdaram”, – deyə futbolçu qeyd edib.
Gavi həmçinin qeyd edib ki, “Barselona”nın yeni baş məşqçisi Hans-Diter Fliklə də münasibətləri yaxşıdır. Ciddi zədə yaşamasına baxmayaraq, o, 2024/25 mövsümündə 42 oyuna çıxaraq 3 qol vurub və 2 məhsuldar ötürmə verib.
Qeyd edək ki, daha əvvəl “Barselona”nın sabiq futbolçusu Usman Dembele də PSJ-yə keçdikdən sonra öz potensialını tam şəkildə ortaya qoyub. Hazırda o, 2025-ci ilin “Qızıl top” mükafatının əsas favoritlərindən biri hesab olunur.
