“Sevilya” klubundan ayrılan Serxio Ramos hələ də özünə yeni komanda tapa bilməyib. 38 yaşlı müdafiəçi bir neçə klubla danışıqlar aparır, lakin yalnız İtaliya nəhəngi “Yuventus” onun transferində maraqlı görünür.
QOL.az-ın məlumatına görə, “Yuventus” hazırda zədələnmiş braziliyalı müdafiəçi Qleison Bremerə əvəzləyici axtarır. “Tuttosport”un xəbərinə görə, Turin klubu Ramosun təcrübəsindən yararlanaraq, müdafiəni gücləndirməyi düşünür. Klub rəhbərliyi Ramosun “Real Madrid” və “Paris Sen-Jermen”dəki təcrübəsinin komanda üçün böyük üstünlük olacağını hesab edir.
Xatırladaq ki, Serxio Ramos 2023-cü ilin yayında azad agent kimi “Sevilya”ya qayıtmış və ötən mövsüm komanda ilə 37 oyuna çıxaraq 7 qol vurmuşdu. Lakin bu yay onun “Sevilya” ilə müqaviləsi başa çatıb.
İspaniya millisinin sabiq ulduzu Ramos daha əvvəl “Real Madrid” və “Paris Sen-Jermen”də də parlaq çıxışlar edib.
