2026-cı il dünya çempionatının 1/8 final mərhələsində daha iki komanda dörddəbir finala yüksəlib. Argentina Misir üzərində möhtəşəm geridönüşə imza ataraq növbəti mərhələyə vəsiqə qazanıb. Digər qarşılaşmada isə İsveçrə Kolumbiyanı yalnız penaltilər seriyasında üstələyərək turnirdə yoluna davam edib.
Messi liderlik etdi, Argentina inanılmaz kambeklə qalib gəldi
Atlanta şəhərindəki “Mercedes-Benz Stadium”da keçirilən oyunda Misir ilk hissədə Yasser İbrahimin, ikinci hissədə isə Mostafa Zikonun qolları ilə 2:0 hesabı ilə önə keçərək sensasiya astanasında idi.
Lakin son dəqiqələrdə dünya çempionu xarakter nümayiş etdirdi. Kristian Romero 79-cu dəqiqədə fərqi azaltdı, beş dəqiqə sonra Lionel Messi hesabı bərabərləşdirdi. Əlavə olunmuş vaxtın ikinci dəqiqəsində isə Enso Fernandes Argentinaya 3:2 hesablı qələbə qazandıran qolu vurdu.
Messi bu görüşdə təkcə qol müəllifi olmadı, həm də Romeronun qoluna məhsuldar ötürmə verdi. Bununla da o, dünya çempionatları tarixində 9 məhsuldar ötürmə ilə bütün dövrlərin ən yaxşı assistenti oldu. Qeyd edək ki, argentinalı ulduz matçın 21-ci dəqiqəsində təyin olunan penaltidən də yararlana bilmədi.
Dünya çempionatı 2026, 1/8 final
Argentina – Misir – 3:2
Qollar: Romero, 79, Messi, 84, Enso Fernandes, 90+2 – Yasser İbrahim, 15, Mostafa Ziko, 67.
Reallaşdırılmayan penalti: Messi, 21.
İsveçrə penaltilərdə daha dəqiq oynadı
Vankuverdəki “BC Place” stadionunda keçirilən İsveçrə – Kolumbiya görüşü isə tam fərqli ssenari ilə yadda qaldı. Komandalar əsas və əlavə vaxt ərzində qapılara yol tapa bilmədilər və matçın taleyi penaltilər seriyasında həll olundu.
Zərbələr seriyasında daha soyuqqanlı çıxış edən İsveçrə futbolçuları 4:3 hesabı ilə qalib gələrək dörddəbir finala yüksəldilər.
Beləliklə, dünya çempionatının 1/4 final mərhələsində Argentina ilə İsveçrə milliləri üz-üzə gələcək.
Dünya çempionatı 2026, 1/8 final
İsveçrə – Kolumbiya – 0:0 (pen. 4:3)
