Bu gün UEFA-nın təşkil etdiyi klub turnirlərində III təsnifat mərhələsinin püşkatma mərasimləri keçiriləcək və Azərbaycan təmsilçilərinin növbəti raunddakı potensial rəqibləri bəlli olacaq. Püşklər UEFA Çempionlar Liqası, Avropa Liqası və Konfrans Liqasını əhatə edəcək. III təsnifat mərhələsinin oyunları Çempionlar Liqasında 4-5 və 11 avqust, Avropa Liqası və Konfrans Liqasında isə 6 və 13 avqust tarixlərində baş tutacaq.
Çempionlar Liqasında mübarizə aparan “Sabah” püşkatmada səpələnməmişlər səbətində yer alacaq. Bakı təmsilçisi əvvəlcə Finlandiyanın “KuPS” komandası səddini keçməyə çalışacaq. Komanda növbəti mərhələyə yüksələcəyi təqdirdə aşağıdakı cütlüklərdən birinin qalibi ilə qarşılaşa bilər:
- “Larne” (Şimali İrlandiya) – “Srvena Zvezda” (Serbiya)
- “Tun” (İsveçrə) – “Dinamo” Zaqreb (Xorvatiya)
- “İberiya” (Gürcüstan) – “Slovan” (Slovakiya)
- “Orxus” (Danimarka) – “Lex” (Polşa)
- “Eqnatiya” (Albaniya) – “Sele” (Sloveniya)
- “Omoniya” (Kipr) – “Kayrat” (Qazaxıstan)
“Qarabağ”, “Neftçi” və “Zirə” də rəqiblərini gözləyir
Avropa Liqasında çıxış edən “Qarabağ” III təsnifat mərhələsinin püşkatmasına səpələnmiş komanda kimi qatılacaq. Ağdam klubu ikinci təsnifat mərhələsində Bolqarıstanın ÇSKA Sofiya komandası ilə üz-üzə gələcək. Bu mərhələni uğurla keçəcəyi halda isə potensial rəqibləri bunlardır:
- “Şerif” (Moldova) – “Makkabi” Təl-Əviv (İsrail) cütünün qalibi
- “Şturm” (Avstriya) – “Harts” (Şotlandiya) cütünün məğlubu
- “Fənərbağça” (Türkiyə) – “Qurnik” (Polşa) cütünün məğlubu
Konfrans Liqasında isə həm “Neftçi”, həm də “Zirə” səpələnməmişlər səbətində yer alacaq. “Neftçi” ikinci təsnifat mərhələsində Belarusun “Dinamo” (Minsk) klubu ilə, “Zirə” isə Estoniyanın “Payde” komandası ilə mübarizə aparacaq.
“Neftçi” növbəti raunda yüksəlsə, aşağıdakı rəqiblərdən biri ilə qarşılaşa bilər:
- “Jelezniçar” (Bosniya və Herseqovina) – “Braqa” (Portuqaliya) cütünün qalibi
- “Pakş” (Macarıstan) – “Panatinaikos” (Yunanıstan) cütünün qalibi
- “Luqano” (İsveçrə) – “Dukadjini” (Kosovo) cütünün qalibi
- AEK Larnaka (Kipr) – “Beytar” (İsrail) cütünün qalibi
“Zirə”nin mümkün rəqibləri isə bunlardır:
- “Bravo” (Sloveniya) – “Şkendiya” (Şimali Makedoniya)
- “Santa Koloma” (Andorra) – “Rapid” (Avstriya)
- “Rakuv” (Polşa) – “Valletta” (Malta)
- “Riyeka” (Xorvatiya) – “Derri Siti” (İrlandiya)
- “Polesye” (Ukrayna) – “Kopenhagen” (Danimarka)
Azərbaycan klubları üçün püşkatmanın nəticələri avrokuboklarda növbəti mərhələyə aparan yolun necə formalaşacağını müəyyən edəcək və xüsusilə “Qarabağ”ın “Fənərbağça”, “Neftçi”nin isə “Braqa” ilə mümkün duelləri artıq futbolsevərlərin diqqət mərkəzindədir.
