Azərbaycanın 20 yaşadək basketbolçulardan ibarət kişi millisi bu gün FIBA U-20 Avropa çempionatının B divizionunda növbəti oyununa çıxacaq. Slovakiyanın paytaxtı Bratislavada keçirilən turnirdə yığmamız 9–16-cı yerlər uğrunda təsnifat mərhələsində İsveçrə millisi ilə qarşılaşacaq. Oyun Bakı vaxtı ilə 20:30-da başlayacaq.
Komandamız qrup mərhələsini bir qələbə və üç məğlubiyyətlə başa vuraraq 9–16-cı yerlər uğrunda mübarizəyə vəsiqə qazanıb.
Yığmamız indiyədək keçirdiyi oyunlarda aşağıdakı nəticələri göstərib:
- İsveç – Azərbaycan – 85:58
- Azərbaycan – Slovakiya – 72:66
- Azərbaycan – İrlandiya – 47:54
- Azərbaycan – Şimali Makedoniya – 57:67
İsveçrə ilə vacib qarşılaşma
İsveçrə millisi də qrup mərhələsini ilk səkkizlikdən kənarda başa vurduğu üçün təsnifat oyunlarında çıxış edir. Bugünkü görüşün qalibi 9–12-ci yerlər, məğlub komanda isə 13–16-cı yerlər uğrunda mübarizəni davam etdirəcək.
Qeyd edək ki, FIBA U-20 Avropa çempionatının B divizionu iyulun 10–20-də Bratislavada keçirilir. Turnirdə 21 milli komanda iştirak edir və yalnız ilk üç yeri tutan yığmalar növbəti mövsüm A divizionuna yüksəlmək hüququ əldə edəcək.
