UEFA Çempionlar Liqasının 1/4 final mərhələsinə start verilib və ilk oyun günü maraqlı nəticələrlə yadda qalıb. Avropanın aparıcı klubları mübarizəyə qoşularkən, bəzi komandalar səfərdə vacib qələbələr qazanaraq cavab oyunları öncəsi üstünlük əldə ediblər.
“Bavariya” və “Arsenal”dan vacib qələbələr
İlk qarşılaşmalardan biri Madriddə baş tutub. Almaniyanın “Bavariya” klubu səfərdə “Real Madrid” üzərində 2:1 hesablı qələbə qazanıb. Görüşün ilk hissəsində üstün oyun nümayiş etdirən Münhen təmsilçisi 41-ci dəqiqədə Luis Diazın qolu ilə hesabı açıb. Fasilədən dərhal sonra, 46-cı dəqiqədə Harri Keyn fərqi artıraraq komandasını daha rahat vəziyyətə gətirib.
Matçın sonlarına yaxın “Real Madrid” cavab qolunu vurmağa nail olub. 74-cü dəqiqədə Kilian Mbappe fərqlənsə də, bu qol oyunun taleyini dəyişməyib. Beləliklə, “Bavariya” səfərdə önəmli qələbə qazanaraq cavab görüşü öncəsi üstün mövqe əldə edib. Komandalar arasında ikinci oyun aprelin 15-də Münhendə keçiriləcək.
Digər oyunda isə İngiltərənin “Arsenal” klubu Portuqaliyada “Sportinq”in qonağı olub. Lissabondakı qarşılaşma gərgin mübarizə şəraitində keçib. Matçın 64-cü dəqiqəsində Martin Subimendinin vurduğu qol ofsayd səbəbilə qeydə alınmayıb.
Görüşün taleyi əlavə olunmuş dəqiqələrdə həll olunub. 90+1-ci dəqiqədə Kay Havertz dəqiq zərbə ilə komandasına 1:0 hesablı qələbə qazandırıb. Cavab oyunu aprelin 15-də Londonda keçiriləcək və “Arsenal” bu üstünlüyü qorumağa çalışacaq.
1/4 final mərhələsinin ilk oyunları bu gün keçiriləcək iki maraqlı görüşlə davam edəcək. Avropa nəhənglərinin qarşılaşacağı bu matçlar mərhələnin ümumi mənzərəsini daha da aydınlaşdıracaq.
Bu günün proqramı:
- 23:00 – PSJ (Fransa) – “Liverpul” (İngiltərə)
- 23:00 – “Barselona” (İspaniya) – “Atletiko” (İspaniya)
Bu oyunlar həm turnirin favoritlərinin forması, həm də yarımfinala namizədlərin müəyyənləşməsi baxımından böyük əhəmiyyət daşıyır.
Qeyd edək ki, 1/4 final mərhələsinin cavab görüşləri aprelin 14 və 15-də keçiriləcək və həmin oyunlardan sonra yarımfinalçılar bəlli olacaq.
