2026-cı il dünya çempionatında ikinci turun daha iki maraqlı qarşılaşması baş tutub. C qrupunda Braziliya Haiti üzərində inamlı qələbə qazanaraq qrupun zirvəsinə yüksəlib. D qrupunda isə Paraqvay minimal hesablı qələbə sayəsində pley-off ümidlərini qoruyub, Türkiyə millisi isə turnirlə erkən vidalaşıb.
Filadelfiyadakı “Lincoln Financial Field” stadionunda keçirilən oyunda Braziliya millisi Haitini 3:0 hesabı ilə məğlub edib. Cənubi amerikalılar ilk hissədə vurduqları qollarla oyunun taleyini həll ediblər. Matheus Kunya iki dəfə fərqlənərək komandasının əsas qəhrəmanı olub. Vinisius Junior da adını bombardirlər siyahısına yazdırıb.
Bu nəticədən sonra Braziliya iki turdan sonra 4 xalla qrupun liderinə çevrilib. Haiti isə ikinci məğlubiyyətini alaraq pley-off şanslarını tamamilə itirib.
DÇ-2026. C qrupu, II tur
Braziliya – Haiti – 3:0
Qollar: Matheus Kunya, 23, 36, Vinisius Junior, 45+3
Paraqvay erkən qolla qələbə qazandı
Santa-Klaradakı “Levi’s Stadium”da keçirilən Türkiyə – Paraqvay görüşü də dramatik hadisələrlə yadda qalıb. Qarşılaşmanın taleyini matçın ilk saniyələrində vurulan qol həll edib. Paraqvay millisi Türkiyəni 1:0 hesabı ilə məğlub etməyi bacarıb.
Matias Qalarsa oyunun 1-ci dəqiqə 5-ci saniyəsində fərqlənərək mundialın ən sürətli qollarından birinə imza atıb. Paraqvay fasiləyə yaxın ciddi itki ilə üzləşib. Migel Almiron 45+3-cü dəqiqədə birbaşa qırmızı vərəqə alaraq komandasını azlıqda qoyub.
Say üstünlüyünə baxmayaraq Türkiyə ikinci hissədə hesabı bərabərləşdirə bilməyib. Nəticədə ardıcıl ikinci məğlubiyyətini alan komanda pley-off şanslarını itirib. Paraqvay isə 3 xalla qrupda mübarizəni davam etdirir.
DÇ-2026. D qrupu, II tur
Türkiyə – Paraqvay – 0:1
Qol: Qalarsa, 2
Qırmızı vərəqə: Almiron, 45+3 (Paraqvay)
