Kriştianu Ronaldunun çıxış etdiyi Səudiyyə Ərəbistanının “Əl-Nəsr” klubu yeni mövsüm öncəsi gözlənilməz maliyyə problemləri ilə üzləşib. Səudiyyənin “Riyadiyah” nəşrinin yaydığı məlumata görə, klubda yaranan likvidlik çatışmazlığı həm inzibati qərarlara, həm də transfer planlarına ciddi təsir göstərib.
Məlumata əsasən, əsas komandanın bəzi futbolçuları iyun ayına görə nəzərdə tutulan maaşlarını tam ala bilməyiblər. Klub rəhbərliyi qalan vəsaitin qısa müddətdə ödənilməsi üçün maliyyə imkanlarının səfərbər edildiyini bildirir. Maliyyə sıxıntısı səbəbindən yeni mövsümə hazırlıq çərçivəsində nəzərdə tutulan bir sıra daxili proseslər də müvəqqəti olaraq təxirə salınıb.
Transfer planları da dayandırılıb
Likvidlik problemi “Əl-Nəsr”in transfer bazarındakı fəaliyyətinə də təsirsiz ötüşməyib. Marselo Brozoviçin klubdan ayrılmasından sonra rəhbərlik onun yerinə xarici yarımmüdafiəçi transfer etməyi planlaşdırsa da, hazırkı maliyyə vəziyyətinə görə namizədlərlə rəsmi danışıqlara başlanılmayıb. Klub əvvəlcə büdcə məsələlərini həll etməyi, daha sonra isə transfer çalışmalarını bərpa etməyi nəzərdə tutur.
Komanda yeni mövsümə avstraliyalı mütəxəssis Ange Postekoqlunun rəhbərliyi altında hazırlaşır. Baş məşqçi “Əl-Nəsr”lə iki illik müqavilə imzalayıb və qarşıdakı mövsümdə kollektiv Səudiyyə Ərəbistanı Pro Liqası, Kral Kuboku, Superkubok və AFC Çempionlar Liqasının Elit turnirində mübarizə aparacaq.
Hazırda klub rəhbərliyinin əsas məqsədi maliyyə sabitliyini bərpa etmək və transfer bazarında yenidən aktiv fəaliyyətə başlamaqdır. Bu prosesin nə qədər davam edəcəyi isə yaxın həftələrdə məlum olacaq.
