Səudiyyə Ərəbistanının paytaxtı Ər-Riyadda keçiriləcək böyük boks gecəsinin bütün iştirakçıları müəyyənləşib. Oktyabrın 31-nə planlaşdırılan turnirin əsas qarşılaşmasında meksikalı Saul Kanelo Alvares WBC çempionu Kristian Mbilli ilə üz-üzə gələcək.
“Mexico vs The World” (“Meksika dünyaya qarşı”) adlanan boks gecəsində ümumilikdə 10 döyüş keçiriləcək. Onlardan dördündə dünya çempionluğu titulları uğrunda mübarizə aparılacaq.
Ər-Riyaddakı ANB Arena idman kompleksində təşkil olunacaq turnir Riyadh Season tədbirləri çərçivəsində baş tutacaq. Qarşılaşmaların DAZN platformasında yayımlanması nəzərdə tutulur.
Kanelo – Mbilli boks gecəsinin tam proqramı
Təşkilatçıların açıqladığı siyahıya əsasən, turnirdə aşağıdakı qarşılaşmalar keçiriləcək:
- Saul Alvares – Kristian Mbilli (WBC, ikinci orta çəki)
- Xayme Munqiya – Nikita Zon (WBA, ikinci orta çəki)
- Rafael Espinosa – Lorenso Parra (WBO, yarımyüngül çəki)
- Lindolfo Delqado – Artur Biyarslanov (IBF, birinci yarımorta çəki, vakant titul)
- David Pikasso – Karl Ceyms Martin (ikinci ən yüngül çəki)
- Reyto Tsutsumi – Raymundo Roxas (ikinci yarımyüngül çəki)
- Sultan Əl-Məhəmməd – Erik Vilyeqas (ikinci yarımyüngül çəki)
- Bek Nurmaqambet – Markos Vaskes (ikinci orta çəki)
- Karlos Emiliano – Flavius Bya (orta çəki)
- Brayan Leon – Hektor Aqirre (ikinci orta çəki)
Beləliklə, əsas döyüşdən əlavə, daha üç qarşılaşmada çempionluq kəmərləri ortaya qoyulacaq.
Kanelo dünya çempionu titulunu geri qaytarmaq istəyir
Saul Alvares üçün Kristian Mbilli ilə görüş 2025-ci ilin sentyabrında Terens Krouforda məğlubiyyətindən sonra ilk döyüş olacaq. Həmin qarşılaşmada meksikalı boksçu ikinci orta çəkidə sahib olduğu dörd əsas çempionluq kəmərini itirmişdi.
Alvares peşəkar karyerasında 63 qələbə, 3 məğlubiyyət və 2 heç-heçə qeydə aldırıb. Onun 39 qələbəsi nokautla başa çatıb.
WBC çempionu Kristian Mbilli isə indiyədək 30 peşəkar döyüş keçirib. Kamerun əsilli boksçu 29 qələbə qazanıb, bir qarşılaşmanı heç-heçə ilə tamamlayıb və məğlub olmayıb.
Mbilli sonuncu dəfə 2025-ci ilin sentyabrında Lester Martineslə qarşılaşıb və döyüş heç-heçə nəticələnib. Oktyabrın 31-də keçiriləcək görüş onun WBC çempionluq kəmərini qorumaq baxımından mühüm sınağı olacaq.
