Azərbaycan çempionu “Zirə” minifutbol üzrə Çempionlar Liqasında uğurlu çıxışını davam etdirib. İspaniyanın Kambrils şəhərində təşkil olunan turnirdə Azərbaycan təmsilçisi 1/8 final mərhələsini keçərək ən güclü səkkiz komanda sırasına daxil olub.
“Zirə” pley-off mərhələsində Monteneqronun “Sbbet” komandası ilə qarşılaşıb. Gərgin keçən görüşün əsas vaxtında tərəflərdən heç biri üstünlük qazana bilməyib və qarşılaşma 2:2 hesabı ilə başa çatıb.
Qalibi müəyyənləşdirmək üçün penaltilər seriyasına ehtiyac yaranıb. Burada daha dəqiq oynayan “Zirə” rəqibini 3:1 hesabı ilə üstələyərək Çempionlar Liqasının 1/4 finalına yüksəlib.
“Zirə” turnirdə məğlubiyyətsiz irəliləyir
Seymur Məmmədovun rəhbərlik etdiyi komanda qrup mərhələsində də uğurlu nəticələr göstərmişdi. “Zirə” ilk qarşılaşmasında Bosniya və Herseqovina təmsilçisi “Krayina Plan 21”lə 1:1 hesablı heç-heçə edib.
Növbəti matçda Azərbaycan çempionu Çexiyanın “Hanspaulka” klubunu 2:0 hesabı ilə məğlub edib. Həmin görüşdə “Zirə”nin qollarını İsa Atayev və Samir Həmzəyev vurublar. Bu nəticələr komandanın pley-off mərhələsinə yüksəlməsinə imkan yaradıb.
Azərbaycan turnirdə üç klubla – “Zirə”, “Birbaşa Bakı” və “Aznur”la təmsil olunub. “Aznur” qrup mərhələsində mübarizəni dayandırıb. “Birbaşa Bakı” isə qrupunu uğurla keçsə də, 1/8 final mərhələsində turnirlə vidalaşıb.
Beləliklə, “Zirə” Azərbaycan klubları arasında Çempionlar Liqasında mübarizəni davam etdirən yeganə komanda olaraq 1/4 finala yüksəlib.
