Bakı oktyabrda dünya cüdosunun ən böyük yarışlarından birinə ev sahibliyi edəcək. Böyüklər arasında dünya çempionatı 4–10 oktyabr tarixlərində Milli Gimnastika Arenasında keçiriləcək. Turnirdə altı qitəni təmsil edən 96 ölkədən ümumilikdə 643 cüdoçunun iştirakı nəzərdə tutulub.
Qeydiyyatdan keçən idmançıların 345-i kişi, 298-i qadındır. Qitələr üzrə iştirakçı sayı belədir:
- Avropa: 339 cüdoçu
- Asiya: 155 cüdoçu
- Panamerika: 85 cüdoçu
- Afrika: 44 cüdoçu
- Okeaniya: 12 cüdoçu
Dünya çempionatında ümumilikdə 14 fərdi çəki dərəcəsi üzrə qaliblər müəyyənləşəcək. Kişilər və qadınlar hərəyə yeddi kateqoriyada tatamiyə çıxacaqlar:
- Kişilər: 60 kq, 66 kq, 73 kq, 81 kq, 90 kq, 100 kq və +100 kq
- Qadınlar: 48 kq, 52 kq, 57 kq, 63 kq, 70 kq, 78 kq və +78 kq
Yarış proqramı yeddi günə bölünüb. Oktyabrın 4-də kişilər arasında 60 kq, qadınlarda isə 48 kq çəki dərəcəsində mübarizə ilə çempionata start veriləcək. Son yarış günündə – oktyabrın 10-da kişilərin +100 kq və qadınların +78 kq kateqoriyalarında dünya çempionları bəlli olacaq.
Milli Gimnastika Arenasında keçiriləcək yarış Azərbaycan paytaxtı üçün növbəti böyük cüdo turniri olacaq. Bakı daha əvvəl 2018-ci ildə böyüklər arasında dünya çempionatını qəbul edib.
Beləliklə, səkkiz il sonra dünyanın aparıcı cüdoçuları yenidən Bakıda dünya çempionluğu uğrunda mübarizə aparacaqlar.
