Azərbaycan cüdo millisinin Bakıda keçiriləcək dünya çempionatında iştirak etməsi planlaşdırılan ilkin heyəti müəyyənləşib. Yığmamız mövsümün əsas yarışlarından birində 12 çəki dərəcəsində ümumilikdə 23 cüdoçu ilə təmsil olunacaq.
Heyətə 17 kişi və 6 qadın idmançı daxil edilib. Komandanın tərkibində Hidayət Heydərov, Zelim Kotsoyev və Uşanqi Kokauri kimi təcrübəli cüdoçularla yanaşı, müxtəlif çəkilərdə rəqabət aparan digər milli üzvləri də yer alıblar.
Azərbaycan cüdoçuları performans direktoru və kişilərdən ibarət yığmanın baş məşqçisi Riçard Trautmanın rəhbərliyi altında yarışacaqlar. Kişilərdən ibarət komandanın məşqçilər heyətində Elxan Məmmədov, Elçin İsmayılov, Robert Kravçik və Slavko Tekiç də yer alır. Qadınlardan ibarət milliyə isə Amina Abdellatif rəhbərlik edir, böyük məşqçi vəzifəsini Saşa Herkenrat-Vimar yerinə yetirir.
Qadınlardan ibarət heyət:
- 48 kq: Şəfəq Həmidova, Könül Əliyeva
- 52 kq: Gültac Məmmədəliyeva
- 57 kq: Xədicə Qədəşova
- 70 kq: Südabə Ağayeva
- +78 kq: Madina Kaisinova
Qadınların yarışında Azərbaycan beş çəki dərəcəsində altı idmançı ilə təmsil olunacaq. 48 kq-da iki cüdoçumuzun adı ilkin heyətə daxil edilib.
Kişilərdən ibarət heyət:
- 60 kq: Balabəy Ağayev, Əhməd Yusifov
- 66 kq: Ruslan Paşayev, Turan Bayramov, Nizami İmranov
- 73 kq: Hidayət Heydərov, Rəşid Məmmədəliyev
- 81 kq: Zelim Tçkayev, Ömər Rəcəbli, Vüsal Qələndərzadə
- 90 kq: Murad Fətiyev, Elcan Hacıyev, Süleyman Şükürov
- 100 kq: Zelim Kotsoyev
- +100 kq: Uşanqi Kokauri, Kənan Nəsibov, Camal Qamzatxanov
Kişilər yeddi çəki dərəcəsinin hamısında mübarizə aparacaqlar. Bəzi çəkilərdə Azərbaycan eyni vaxtda iki və ya üç cüdoçu ilə təmsil olunacaq.
Dünya çempionatı 4–11 oktyabr tarixlərində Bakıdakı Milli Gimnastika Arenasında təşkil ediləcək. Fərdi yarışlar oktyabrın 4-dən 10-dək davam edəcək, son gündə isə qarışıq komandalar arasında mükafatçılar müəyyənləşəcək.
