Azərbaycan boksçusu Sübhan Məmmədov Bolqarıstanın paytaxtı Sofiyada keçirilən böyüklər arasında Avropa çempionatında qızıl medal qazanıb. 50 kq çəki dərəcəsində mübarizə aparan milli komandanın üzvü həlledici görüşdə rusiyalı Bair Batlayevlə qarşılaşıb.
Dünya çempionu və U-23 Avropa çempionatının qalibi olan Məmmədov final döyüşündə üstün performans nümayiş etdirib. Azərbaycan təmsilçisi hər üç raundun yekununda üstünlüyünü qoruyaraq hakimlərin 4:1 qərarı ilə Avropa çempionu adını qazanıb.
Hakimlərin yekun xalları 30:27, 29:28, 28:29, 30:27 və 29:28 olub. Məmmədovun qələbəsindən sonra Sofiyada Azərbaycanın Dövlət Himni səsləndirilib.
Səidcamşid Cəfərov da finala yüksəldi
Azərbaycan millisinin digər üzvü Səidcamşid Cəfərov da Avropa çempionatında qızıl medal uğrunda döyüşmək hüququ əldə edib. 75 kq çəki dərəcəsində çıxış edən dünya çempionatının mükafatçısı yarımfinalda İngiltərə təmsilçisi Kalum Meykinlə üz-üzə gəlib.
Cəfərov gərgin keçən qarşılaşmada rəqibini 4:1 hesabı ilə məğlub edib. Hakimlərin qiymətləndirməsi 28:29, 30:27, 30:27, 29:28 və 29:28 şəklində olub. Azərbaycan boksçusu sentyabrın 25-də keçiriləcək finalda rusiyalı İsmayıl Mutsolqovla qarşılaşacaq.
Azərbaycan yığmasının 55 kq çəki dərəcəsində çıxış edən üzvü Amin Məmmədzadə isə turniri bürünc medalla tamamlayıb. Məhəmməd Abdullayev də +90 kq çəki dərəcəsində bürünc medal əldə edib.
Çempionatın son günündə Azərbaycan millisinin daha iki boksçusu qızıl medal uğrunda rinqə çıxacaq. Səidcamşid Cəfərovla yanaşı, 70 kq çəkidə Nəbi İsgəndərov da final döyüşünü keçirəcək. Avropa çempionatı sentyabrın 25-də başa çatacaq.
