Beynəlxalq Cüdo Federasiyası (IJF) tərəfindən açıqlanan yeni dünya reytinqində Azərbaycanın super-ağır çəki kateqoriyasında çıxış edən gənc idmançısı Kənan Nəsibov böyük irəliləyiş nümayiş etdirib. Nəsibov (2055 xal) reytinqdə 11 pillə yuxarı qalxaraq ilk 20-liyə daxil olub.
Bu böyük sıçrayışa 17 noyabrda Xorvatiyanın paytaxtı Zaqrebdə keçirilən Qran-pri turnirindəki uğur səbəb olub. Kənan Nəsibov həmçinin, 1 noyabrda 23 yaşadək cüdoçular arasında keçirilən Avropa çempionatında qızıl medal alaraq, gənclər arasında qitə birinciliyini qazanan ilk azərbaycanlı idmançı kimi tarixə düşüb.
Bu nailiyyətlərdən sonra uzun illər super-ağır çəkidə lider olan Uşanqi Kokauri (7-ci yer, 3386 xal) Kənan Nəsibov kimi ciddi rəqiblə qarşılaşıb. Son iki həftədə ardıcıl iki böyük turnirdə qalib gələn Nəsibovun yüksəlişi diqqət çəkir.
Digər Azərbaycan idmançılarından Olimpiya çempionları Hidayət Heydərov (73 kq, 4176 xal) və Zelim Kotsoyev (100 kq, 5118 xal), həmçinin Elcən Hacıyev (90 kq, 3651 xal) öz mövqelərində ikinci yerləri qoruyub.
Reytinqdə Ruslan Paşayev (66 kq, 2991 xal) beşinci, Zaqreb Qran-prisində bürünc medal əldə edən Vüqar Talıbov (90 kq, 2197 xal) isə 13-cü yerdə qərarlaşıb. Hüseyn Allahyarov (60 kq, 520 xal) isə 65 pillə irəliləyərək 78-ci pilləyə yüksəlib. Eyni çəki dərəcəsində mübarizə aparan Balabəy Ağayev (3356 xal) isə altıncı yerdən yeddinci pilləyə düşüb.
