Bakı yanğınsöndürmə və xilasetmə idmanı üzrə dünya çempionatına ev sahibliyi edir. Kişilər arasında 21-ci, qadınlar arasında 12-ci dünya birinciliyinin rəsmi açılış mərasimi paytaxtda keçirilib, yarışlarda 17 ölkənin komandaları iştirak edir.
Çempionatı Fövqəladə Hallar Nazirliyi və Yanğınsöndürənlərin və Xilasedicilərin Beynəlxalq İdman Federasiyası birgə təşkil edib. Mərasimdə fövqəladə hallar naziri Kəmaləddin Heydərov, beynəlxalq federasiyanın prezidenti Aleksandr Çuprian, xarici dövlətlərin aidiyyəti qurumlarının rəhbərləri və digər rəsmi şəxslər iştirak ediblər.
Nazir Azərbaycanın ev sahibliyi təcrübəsindən danışıb
Kəmaləddin Heydərov çıxışında Azərbaycanın qlobal idman turnirlərinə ev sahibliyi üzrə topladığı təcrübəni xatırladıb. Onun sözlərinə görə, respublikada çağdaş idman infrastrukturu formalaşıb, yerli idmançılar isə nüfuzlu yarışlarda yüksək nəticələr əldə edirlər.
“Azərbaycan möhtəşəm qlobal idman yarışlarına mükəmməl ev sahibliyi etməklə dünyada güclü idman mərkəzi kimi tanınır. Əminəm ki, qarşıdakı yarışlar yüksək idman ustalığının, ədalətli mübarizənin və qarşılıqlı hörmətin parlaq nümunəsinə çevriləcək”, – deyə nazir bildirib.
Nazir çempionatın müxtəlif dövlətlərin nümayəndələri arasında təcrübə mübadiləsi və peşəkar əlaqələrin genişləndirilməsi üçün şərait yaradacağını vurğulayıb. O, qadınların kişilərlə birgə mübarizə aparmasının bərabər imkanlar prinsipi baxımından əhəmiyyətini də qeyd edib.
Rəsmi nitqlərin ardınca dünya çempionatı açıq elan edilib. İştirakçılara Azərbaycanın milli musiqisi və rəqslərindən ibarət bədii proqram göstərilib.
Hücum nərdivanı ilə qalxma üzrə finallar keçirilib
Mərasimdən sonra idmançılar hücum nərdivanı ilə qalxma növündə güclərini sınayıblar. Kişilər arasında yarımfinal və final, qadınlar arasında isə final görüşləri baş tutub.
