Nankində (Çin) noyabrın 4-də batut gimnastikası və tamblinq üzrə 39-cu dünya çempionatı start götürüb. Çempionatın ilk günündə kişilərin tamblinq və qarışıq sinxron tullanma yarışlarında təsnifat mərhələləri keçirilir.
Azərbaycan yığması Nankinə iki fərqli hədəflə yollanıb: tamblinqdə ardıcıl üçüncü dünya çempionluğunu qazanmaq və batut gimnastikasının fərdi yarışlarında ilk dünya medalını əldə etmək.
Tamblinqdə üçüncü qızıl hədəfi
Kişilərdən ibarət tamblinq komandası artıq iki dəfə dünya çempionu adını qazanıb. İlk qızıl 2023-cü ildə Birmingemdə, ikincisi isə 2025-ci ildə İspaniyanın Pamplona şəhərində əldə olunub. 2024-cü ildə dünya çempionatı keçirilmədiyi üçün yığma Nankində məhz bu seriyanı davam etdirməyə çalışır.
Nankində Azərbaycanı Mixail Malkin, Tofiq Əliyev, Adil Hacızadə və Aleksey Karataşov təmsil edir. Malkin, Əliyev və Hacızadə hər iki çempionluqda çıxış ediblər, heyətdə yeganə dəyişiklik Karataşovun komandaya qoşulmasıdır. Yığma Portuqaliyada keçirilən son Avropa çempionatından gümüş medalla qayıdıb.
Fərdi tamblinqdə əsas medal ümidi Mixail Malkindir. O, 2023-cü ildə Azərbaycana bu növdə ilk dünya çempionluğunu qazandırıb, 2021-ci ildə Bakıda keçirilən dünya çempionatında isə gümüş medala sahib çıxıb.
Avropa çempionatını medalsız başa vuran Malkin qısa zamanda əvvəlki formasına qayıdıb. Koimbra şəhərində keçirilən Dünya Kuboku mərhələsində o, yarış şəraitində dünyada ilk dəfə bükülü vəziyyətdə üçqat saltodan, “Miller” və “full” fırlanma kombinasiyasından ibarət elementi yerinə yetirib. Bu çıxış ona həm turnirin qızıl medalını, həm də Dünya Kubokunun ümumi sıralamasında birinciliyi gətirib.
Həmin yarışda Tofiq Əliyev bürünc medala sahib çıxıb. Aleksey Karataşov isə paralel təşkil olunan “Coimbra GymFest” turnirində komanda hesabında qızıl, fərdi yarışda bürünc qazanıb.
Kvota məhdudiyyəti və medal sxemi
Fərdi tamblinqdə hər gimnast iki akrobatik keçid yerinə yetirir və toplanan xallar onun nəticəsini müəyyənləşdirir. 46 iştirakçı arasından ən yaxşı 16 nəticə ikinci təsnifat mərhələsinə (Q2) yüksəlir, oradan səkkiz idmançı ilk finala vəsiqə qazanır. Medal uğrunda isə son dördlük mübarizə aparır.
Milli kvota qaydası da var: ikinci təsnifat mərhələsində bir ölkədən maksimum üç, finalda isə ən çoxu iki gimnast çıxış edə bilər. Buna görə Azərbaycan təmsilçilərinin hamısı ilk 16-lığa düşsə belə, mübarizəni onlardan yalnız üçü davam etdirəcək.
Komanda yarışlarında finalçılar ilk təsnifat mərhələsinin yekunlarına əsasən müəyyənləşir. Finalda hər komandanı üç gimnast təmsil edir, qalib isə üç final raundunda toplanan reytinq xallarının cəmi ilə bəlli olur.
Batut gimnastikasında çempionat qarışıq sinxron tullanma yarışları ilə başlayır. Bu növ dünya çempionatının proqramına ilk dəfə 2025-ci ildə salınıb və həmin yarışda bacı-qardaş Maqsud və Selcan Mahsudovlar tarixi bürünc medal qazanıblar.
Noyabrın 5-də hər iki idmançı fərdi yarışların təsnifat mərhələsində mübarizəyə qoşulacaq. Azərbaycan batut gimnastikasının fərdi yarışlarında indiyədək dünya çempionatı medalı qazanmayıb, bu uğura ən çox yaxınlaşan idmançı isə məhz Selcan Mahsudovadır. O, 2025-ci il dünya çempionatında beşinci yeri tutaraq ölkə tarixinin ən yaxşı fərdi nəticəsinə imza atıb və bu idman növündə Azərbaycanı Olimpiya Oyunlarında təmsil edən ilk gimnast olub.
Mahsudova dünya rekordunun da sahibidir: 2025-ci ildə Almaniyada keçirilən Dünya Kuboku mərhələsində bir kombinasiya daxilində dörd üçqat saltonu uğurla yerinə yetirən ilk qadın gimnast olub.
Noyabrın 6-da kişilərin sinxron tullanma yarışları başlayacaq. Azərbaycanı burada Maqsud Mahsudov və Hüseyn Abbasov dueti təmsil edəcək. Abbasov üçün bu, çempionatdakı yeganə yarış olacaq.
Fərdi batut gimnastikasında təsnifat tamblinqdən fərqlənir: ilk mərhələdə gimnastlar iki proqram yerinə yetirir, lakin yalnız ən yüksək qiymət nəzərə alınır. Kişilərdə 95, qadınlarda 73 iştirakçı arasından ən yaxşı 24 nəticə ikinci təsnifat mərhələsinə yüksəlir, oradan səkkiz idmançı finala vəsiqə qazanaraq medallar uğrunda yarışır.
Yığmanın Nankinə uğurlu nəticələrlə getdiyini Dünya Kubokunun payız mərhələsi də təsdiqləyir. Oktyabrda Almaniyanın Kotbus şəhərində keçirilən mərhələdə Selcan Mahsudova fərdi yarışlarda qızıl medal qazanıb, qardaşı Maqsudla birlikdə qarışıq sinxron tullanmada da birinci olub.
Mövsümün yekunlarına əsasən Maqsud və Selcan Mahsudovlar qarışıq sinxron tullanma üzrə Dünya Kubokunun ümumi qalibi adını qazanıblar. Maqsud Mahsudov və Hüseyn Abbasov dueti isə kişilərin sinxron tullanmasında ümumi sıralamanı birinci pillədə tamamlayıb.
Bütün bunlar göstərir ki, Nankin-2026 Azərbaycan gimnastikası üçün iki tarixi hədəflə yadda qala bilər. Tamblinq yığması ardıcıl üçüncü dünya çempionluğuna iddialıdır, Avropa çempionatındakı gümüş medal isə rəqabətin kifayət qədər güclü olduğunu xatırladır. Batut gimnastikasında əsas diqqət Selcan Mahsudovanın fərdi çıxışına yönələcək və onun son nəticələri bu növdə ilk dünya medalı ehtimalını artırır.
Dünya çempionatı noyabrın 8-də başa çatacaq.
