Azərbaycanlı 18 yaşlı velosipedçi Artyom Proskuryakovun qan analizində dopinqə dair müsbət nəticə aşkarlanması ilə bağlı araşdırmalar davam edir. Bu barədə federasiyanın mətbuat xidmətinin rəhbəri Pərviz Musayev məlumat verib.
Musayevin sözlərinə görə, hazırda qadağan olunmuş maddənin velosipedçinin orqanizmində necə aşkarlandığı araşdırılır. Bu müddət ərzində Proskuryakov Azərbaycan millisinin heyətindən kənarlaşdırılıb. O, beynəlxalq velosipedçilər ittifaqı (UCI) tərəfindən müvəqqəti olaraq yarışlardan kənarlaşdırılıb. Dopinq nümunəsində metamfetamin maddəsinin olduğu təsbit olunub.
Pozitiv dopinq testləri sentyabr ayında Ruanda, Kiqalində keçirilən UCI şosse velosiped idmanı üzrə dünya çempionatında “kəşfiyyat testləri” zamanı götürülən nümunələrdə müəyyən edilib. Həmin yarışda Proskuryakov fərdi yürüşdə 41-ci yeri tutub, qrup yarışında isə finişə çata bilməyib. İdmançıya B nümunələrinin analizini tələb etmək hüququ verilib.
Qeyd edək ki, əvvəllər, hətta bu ilin iyul ayında Azərbaycan Milli Antidopinq Agentliyi (AMADA) Proskuryakov daxil olmaqla ölkə çempionatının bütün mükafatçılarını yoxlamışdı və heç bir qadağan olunmuş maddə aşkar edilməmişdi.
Pərviz Musayev əlavə edib ki, dopinq hadisəsindən sonra milli komandanın digər üzvlərinin yenidən yoxlanılması AMADA-nın qərarına bağlıdır. Federasiya isə bu prosesə tam dəstək verməyə hazırdır.
