Budapeştdə keçirilən U-23 Avropa boks çempionatının 1/4 final mərhələsi başa çatıb. Azərbaycan Boks Federasiyasının məlumatına görə, komandamızın daha iki boksçusu növbəti mərhələyə vəsiqə qazanıb.
Sübhan Məmmədov 50 kq çəki dərəcəsində İtaliyalı rəqibi Salvator Attrattivonu 5:0 (hər üç raundda 30:27) məğlub edərək, yarımfinala yüksəlib. O, növbəti qarşılaşmada İrlandiyadan olan Luis Runi ilə üz-üzə gələcək.
Digər boksçumuz Səbuhi Əlizadə isə +90 kq çəkidə Ukraynalı İliya Zinkovskiyə ikinci raundda tam üstünlüklə qalib gəlib. O, yarımfinalda Xorvatiyalı Marko Perkoviçi ilə mübarizə aparacaq.
Beləliklə, Azərbaycan təmsilçilərinin yarımfinala çıxan sayı üçə çatıb. Daha əvvəl Tağı Nəsibov (60 kq) da özünü yarımfinalda təsdiqləmişdi.
Yarımfinal döyüşləri noyabrın 28-də keçiriləcək və bu mərhələyə yüksələn boksçularımız azı bürünc medal qazanmaq hüququnu təmin ediblər.
