Avropanın ən prestijli basketbol liqası sayılan Avroliqada yaxın gələcək üçün ciddi format yenilikləri planlaşdırılır. Liqanın icraçı direktoru Paulius Moteunas bildirib ki, hazırda müxtəlif yeni strukturlar üzərində iş aparılır. Mümkün dəyişikliklər arasında “Ulduzlar oyunu”nun təşkili, sezon ortasında əlavə turnirin keçirilməsi, iştirak edən komandaların sayının 24-ə qədər artırılması və iki konfranslı sistemə keçid yer alır.
Moteunas qeyd edib ki, ideal variant kimi 22 və ya 24 komandalı sistem görülür və bu komandalar iki konfransa bölünməklə yeni format tətbiq edilə bilər. Onun sözlərinə görə əsas məqsəd oyunların təqvimini yüngülləşdirmək və turnirə daha çox dinamika əlavə etməkdir. Eyni zamanda, tarixən Avroliqanın ən maraqlı derbisi sayılan “Olimpiakos” – “Panatinaikos” qarşılaşmasının qorunması prioritetdir. Uzaq səfərlər və təşkilati məsələlər isə format dəyişiklikləri baxımından kritik amillər kimi diqqətdədir.
Avroliqanın rəhbəri həmçinin bildirdi ki, qarşıdakı 3-5 ildə liqanın ümumi dəyəri 3 milyard avro (təxminən 5.6 milyard manat) səviyyəsinə çatdırılacaq. Burada məqsəd gəlirin artırılması deyil, klublar və idarə heyəti ilə razılaşdırılmış strateji hədəflərə çatmaqdır. Mövcud format 20 komandaya qədər tətbiq olunur, lakin bunun daha çox komandaya genişləndirilməsi halda konfrans sistemi tətbiq ediləcək. Bu yeni model Avroliqanın gələcək inkişafında əsas dönüş nöqtəsi ola bilər və Avropanın elit basketbol yarışının formatının təkmilləşdirilməsinə xidmət edəcək.
