Azərbaycan Cüdo Federasiyasının (ACF) Hakimlər Komitəsi tərəfindən milli komandaların Təlim-Məşq Mərkəzində ölkə çempionatına hazırlıq məqsədilə hakimlər üçün seminar təşkil olunub. Tədbir ACF prezidentinin müşaviri Natiq Bağırov və “A” kateqoriyalı beynəlxalq hakim Mətin Rəhimlinin rəhbərliyi altında keçirilib.
Seminar Dövlət Himninin səsləndirilməsi ilə başlayaraq, hakimlərin davranış qaydaları barədə xatırlatmalarla davam etdirilib. Daha sonra yuko və vaza-ari xalları arasındakı fərqlər, “saxta hücum” anlayışı və tatamidən kənara çıxma hallarında cərimə xalı (şido) verilmə şərtləri müzakirə olunub. Müzakirələr zamanı hakimlərin lisenziya və qaydalara riayət etməsi, necə daha dəqiq qərarlar vermələri ilə bağlı təcrübə paylaşılıb.
Bu seminarın məqsədi ölkə çempionatında yüksək keyfiyyətli hakimlik təmin etmək və gənc, təcrübəsiz hakimlərə peşəkarlıq səviyyəsini artırmaq üçün dəstək verməkdir. Hakimlərin daha dəqiq və obyektiv qərar verməsi yarışların ədalətli keçirilməsində əsas faktordur.
