“Formula-1”də mübarizə aparan “Aston Martin” komandası strategiya direktoru Endi Kouellin komandadan ayrılacağı ilə bağlı yayılan xəbərlərə aydınlıq gətirib.
Klubun rəsmi açıqlamasında britaniyalı mütəxəssisin hazırda vəzifəsini icra etməyə davam etdiyi bildirilib. Qeyd olunub ki, Kouell komandanın gündəlik fəaliyyətində aktiv şəkildə iştirak edir və texniki istiqamətdə mühüm proseslərə rəhbərlik edir.
Bəyanata əsasən, Endi Kouell yeni nəsil güc qurğusunun, yanacaq sisteminin və şassinin problemsiz şəkildə uyğunlaşdırılması üçün tərəfdaşlarla əməkdaşlığın koordinasiyasında mühüm rol oynayır. O, həmçinin 2026-cı ildə qüvvəyə minəcək texniki reqlament dəyişiklikləri fonunda komandanın uzunmüddətli strategiyasının formalaşdırılmasında iştirak edir.
Son günlər bəzi media orqanlarında Kouellin təşkilati strukturda mümkün dəyişikliklər səbəbindən 2026-cı ilin yayında komandadan ayrıla biləcəyi barədə məlumatlar yayılmışdı. Bu iddialar ictimaiyyət arasında müzakirələrə səbəb olsa da, “Aston Martin” rəhbərliyi həmin xəbərləri təsdiqləməyib.
Beləliklə, komandanın mövqeyinə görə, Endi Kouell hazırda “Aston Martin”də fəaliyyətini davam etdirir və strateji proseslərin əsas fiqurlarından biri olaraq qalır.
