UEFA Çempionlar Liqasının pley-off mərhələsində ilk oyunlar bu gün keçirilir. Avropanın nəhəng klubları 1/8 finala vəsiqə uğrunda mübarizəyə başlayır. İlk oyun günündə ümumilikdə dörd qarşılaşma baş tutacaq və bütün görüşlər azarkeşlər üçün böyük maraq doğurur.
Günün açılış matçı Türkiyədə oynanılacaq. Galatasaray doğma meydanda Juventus-u qəbul edəcək. İstanbulda keçiriləcək görüş Bakı vaxtı ilə saat 21:45-də start götürəcək.
Digər üç qarşılaşma isə gecə saatlarında baş tutacaq.
17 fevral – ilk oyunlar:
- 21:45 – Galatasaray (Türkiyə) – Juventus (İtaliya)
- 00:00 – Benfica (Portuqaliya) – Real Madrid (İspaniya)
- 00:00 – Borussia Dortmund (Almaniya) – Atalanta (İtaliya)
- 00:00 – Monaco (Fransa) – Paris Saint-Germain (Fransa)
Madrid “Real”ı əsas mərhələdə qarşılaşdığı “Benfika” ilə yenidən üz-üzə gələcək. Fransa derbisində PSJ səfərdə “Monako”nun qonağı olacaq.
Azərbaycan çempionu Qarabağ FK isə pley-off çərçivəsində sabah Bakıda Newcastle United ilə qarşılaşacaq. Ağdam təmsilçisi doğma azarkeşlər önündə sərfəli nəticə qazanmağa çalışacaq.
Qeyd edək ki, pley-off mərhələsi iki oyundan ibarətdir və qaliblər Çempionlar Liqasının 1/8 final mərhələsinə yüksələcəklər. İlk oyunlar komandaların taktiki üstünlüyü baxımından xüsusi əhəmiyyət daşıyır və bu axşamkı qarşılaşmalar turnirin gedişatına ciddi təsir göstərə bilər.
