Formula 1-də 2026-cı ildən qüvvəyə minəcək yeni güc qurğusu reqlamenti ətrafında müzakirələr qızışır. Red Bull Powertrains-in texniki direktoru Ben Hocqkinson istehsalçılar arasında daha açıq və sərbəst rəqabətin tərəfdarı olduğunu bildirib. Onun fikrincə, mövcud büdcə limiti şəraitində əlavə məhdudiyyətlərə ehtiyac yoxdur.
2026 mövsümündən etibarən güc qurğusu istehsalçıları üçün də xərc limiti tətbiq ediləcək. Bu limit 190 milyon dollar səviyyəsində müəyyənləşdirilib və performans, etibarlılıq və səmərəlilik uğrunda xərcləri məhdudlaşdıracaq.
Yeni nəsil mühərriklər 1 mart tarixində FIA tərəfindən rəsmi homologasiyadan keçməlidir. Bu proses çərçivəsində beş istehsalçı layihələrini təsdiq üçün təqdim edəcək və fiziki nümunələri sənədlərlə birlikdə quruma göndərəcək.
“Homologasiyanı ləğv edib açıq mübarizə aparardım”
Hocqkinson hesab edir ki, xərc limiti və dinamometr saatlarına qoyulan məhdudiyyətlər kifayət qədər sərtdir: “Şəxsən mən homologasiyanı aradan qaldırıb əlcəksiz mübarizə aparılmasının tərəfdarı olardım. Amma reallıq budur ki, hazırkı sistemlə işləməliyik”.
Homologasiyadan sonra inkişaf imkanları ciddi şəkildə məhdudlaşır. Beşillik dövr ərzində yalnız müəyyən sahələr üzrə yeniləmələrə icazə verilir. Əlavə olaraq, ADUO adlanan mexanizm geridə qalan istehsalçılara müəyyən güzəştlər təqdim edir.
FIA hər altı yarışdan sonra performans indeksini qiymətləndirərək fərqin müəyyən faiz həddini keçməməsinə nəzarət edir. Hocqkinson vurğulayıb ki, güc qurğularında dəyişiklik etmək şassi ilə müqayisədə daha uzun zaman tələb edir: “Mən yalnız iki bolidi deyil, bütün mühərrik parkını yeniləməliyəm. Bəzən 12 aqreqatı dəyişmək lazım gəlir və bu, aylarla vaxt aparır”. Onun sözlərinə görə, bəzi metal detalların istehsal müddəti 12 həftəyə çata bilər və sınaq prosesi də eyni qədər vaxt tələb edir.
Bu səbəbdən mövsümün əvvəlində üstünlük qazanan istehsalçını qısa müddətdə yaxalamaq çətindir. “Əgər indi əlavə 20 kilovat gücümüz olsaydı, dərhal tətbiq edərdik”, – deyə o əlavə edib.
