Portuqaliyalı ulduz Kriştianu Ronaldu futbol meydanındakı uğurlarını biznes sahəsində də davam etdirir.
“Əl-Nəsr”in hücumçusu İspaniyanın “Almeriya” klubunun səhmlərinin 25 faizini əldə etdiyini rəsmən açıqlayıb. Bu addım onun idman sənayesində investisiya strategiyasının növbəti mərhələsi kimi qiymətləndirilir.
Sövdələşmə Ronaldunun rəhbərlik etdiyi “CR7 SA” şirkətinin yeni yaradılmış törəmə qurumu – “CR7 Sports Investments” vasitəsilə reallaşdırılıb. Beləliklə, beşqat “Qızıl top” sahibi artıq klub idarəçiliyində də söz sahibi olacaq.
“Futbola meydandan kənarda da töhfə vermək istəyirəm”
Hazırda İspaniyanın ikinci divizionu – Sequndada çıxış edən “Almeriya” turnir cədvəlində üçüncü pillədə qərarlaşıb və La Liqaya yüksəlmək uğrunda mübarizə aparır. Klubun ambisiyalı planları Ronaldunun sərmayəsi ilə daha da güclənə bilər.
Ronaldu qərarı ilə bağlı danışarkən bildirib: “Uzun müddətdir futbola yalnız oyunçu kimi deyil, idarəetmə səviyyəsində də töhfə vermək istəyirdim. ‘Almeriya’ möhkəm struktura və böyük inkişaf potensialına malikdir. Klubun yeni inkişaf mərhələsində rəhbərliklə birlikdə çalışmaq niyyətindəyəm”.
Xatırladaq ki, “Almeriya”nın hazırkı prezidenti Məhəmməd əl-Xereyci ötən il klubu Türki əl-Şeyxdən satın alıb. Əl-Xereyci ilə yaxın münasibətləri olan Ronaldunun sərmayəsi həm əsas komandanın, həm də akademiya sisteminin inkişafı baxımından yeni imkanlar yarada bilər.
Bu addım Ronaldunun aktiv futbolçu karyerası ilə paralel olaraq klub sahibliyi və idarəçiliyi sahəsində də mövqeyini gücləndirdiyini göstərir.
