Formula-1 üzrə 2026 mövsümü bu həftə Avstraliyada start götürür. Çempionatın ilk mərhələsi ənənəvi olaraq Melburnda keçirilən Avstraliya Qran-prisi olacaq. Albert Park trasında baş tutacaq yarış həftəsonu azarkeşlər üçün erkən saatlarda keçiriləcək, lakin mövsümün ilk mərhələsi hər zaman böyük maraq doğurur.
Melburndakı şəhər trası Formula-1 təqvimində ən rəngarəng və atmosferli mərhələlərdən biri hesab olunur. Park ərazisində qurulan bu müvəqqəti dövrə sürət və texniki çətinliklərin birləşməsi ilə seçilir. Buna görə də mövsümün ilk yarışı komandalar və pilotlar üçün ciddi sınaq sayılır.
Yarış həftəsonunun proqramı (Bakı vaxtı)
Avstraliya Qran-prisi çərçivəsində bütün sessiyalar üç gün ərzində keçiriləcək.
Cümə – 6 mart
- 05:30 – 06:30 — Birinci sərbəst yürüş
- 09:00 – 10:00 — İkinci sərbəst yürüş
Şənbə – 7 mart
- 05:30 – 06:30 — Üçüncü sərbəst yürüş
- 09:00 – 10:00 — Kvalifikasiya
Bazar – 8 mart
- 08:00 – 10:00 — Yarış
Albert Park trası haqqında qısa məlumat
Melburn Avstraliyanın ikinci ən böyük şəhəridir və yarış şəhərin mərkəzində yerləşən Albert Park ərazisində keçirilir. Tras süni gölün ətrafındakı park yolları üzərində qurulmuş müvəqqəti şəhər dövrəsidir.
Son illərdə tras bir neçə dəfə yenilənib. Yenidənqurma işlərindən sonra dövrə daha sürətli olub və yeni tribunalar tikilib. Onlardan ikisi dünya çempionları Cimmi Klark və Niki Laudanın şərəfinə adlandırılıb.
Avstraliya Qran-prisi ilk dəfə 1985-ci ildə keçirilib. 1996-cı ildən isə yarış Melburnda təşkil olunur. Mövcud müqaviləyə əsasən, mərhələ ən azı 2035-ci ilə qədər Formula-1 təqvimində qalacaq.
Albert Park trasının əsas göstəriciləri belədir:
- Dövrənin uzunluğu — 5,278 km
- Yarış məsafəsi — 306,124 km
- Dövrələrin sayı — 58
Tras kifayət qədər sürətlidir və pilotlar dövrənin təxminən 66 faizini tam qazla keçirirlər. Ən yaxşı ötmə nöqtəsi start düzünün sonundakı əyləc zonası hesab olunur.
Albert Park trasının rekord dövrəsi isə Ferrari pilotu Şarl Leklerə məxsusdur. O, 2024-cü ildə 1:19.813 nəticə göstərib.
