Amerikalı qolf ulduzu Tayger Vuds sağlamlıq vəziyyəti ilə əlaqədar karyerasında fasilə verəcəyini açıqlayıb. İdmançı bildirib ki, baş verən son hadisələrdən sonra diqqətini tam şəkildə müalicəyə və şəxsi vəziyyətinin yaxşılaşdırılmasına yönəltmək niyyətindədir.
Qeyd edək ki, insident ötən həftə Floridada baş verib. 15 dəfə “Major” turnirlərinin qalibi olan Vudsun idarə etdiyi avtomobil iki zolaqlı yolda qəzaya uğrayaraq aşıb. Hadisə nəticəsində xəsarət alan olmasa da, idmançı polis tərəfindən saxlanılıb və sərxoş vəziyyətdə nəqliyyat vasitəsini idarə etməkdə şübhəli bilinib. O, daha sonra girov qarşılığında sərbəst buraxılıb.
Qolfçu sosial şəbəkədə paylaşdığı açıqlamada vəziyyətin ciddiliyini anladığını bildirib:
“Hazırda içində olduğum vəziyyətin məsuliyyətini dərk edirəm. Müalicə üçün müəyyən müddət fasilə götürəcəyəm və sağlamlığımı prioritetə çevirəcəyəm”.
O əlavə edib ki, məqsədi həm fiziki, həm də psixoloji baxımdan daha güclü şəkildə geri qayıtmaqdır. Vuds eyni zamanda şəxsi həyatına hörmətlə yanaşılmasını xahiş edib.
Məhkəmə prosesi və qəza detalları
Məhkəmə sənədlərinə əsasən, 50 yaşlı idmançı ona qarşı irəli sürülən ittihamları qəbul etməyib və işin andlılar məhkəməsində baxılmasını istəyib. Növbəti dinləmənin mayın 5-nə təyin olunduğu bildirilib.
İstintaq materiallarında qeyd olunur ki, qəza zamanı Vuds diqqətinin yayındığını və qarşıdakı avtomobilin sürətinin azaldığını gec fərq etdiyini deyib. Hüquq-mühafizə orqanlarının məlumatına görə, onun üzərində dərman preparatları aşkar edilib və davranışında qeyri-adi hallar müşahidə olunub.
Polis hesabatında həmçinin idmançının hərəkətində çətinlik çəkdiyi, axsadığı və sağlamlıq problemləri barədə məlumat verdiyi qeyd olunub. Vuds daha əvvəl çoxsaylı əməliyyatlar keçirdiyini, xüsusilə bel və ayaq nahiyəsində ciddi müdaxilələr olduğunu bildirib.
Hazırda onun idman karyerasına nə vaxt qayıdacağı ilə bağlı dəqiq tarix açıqlanmayıb.
