2026 mövsümündə qüvvəyə minən yeni texniki reqlament Formula 1-də bolidlərin ölçü və çəkisinə ciddi təsir göstərib. Bu dəyişikliklərin əsas məqsədi maşınları daha yüngül və çevik etməkdir.
Yeni qaydalara əsasən, minimum çəki həddi 768 kq olaraq müəyyən edilib, lakin mövsümün əvvəlində bütün komandalar bu göstəriciyə yaxınlaşa bilməyib.
Mütəxəssislər qeyd edir ki, bolidin çəkisi trasda nəticələrə birbaşa təsir edir. Hesablamalara görə, əlavə hər 10 kq çəki təxminən 0,3 saniyə vaxt itkisinə səbəb olur. Xüsusilə uzun dövrəli traslarda bu fərq daha da hiss olunur və yarışın taleyinə təsir edə bilər.
Yeni reqlament və komandaların vəziyyəti
Məlumatlara əsasən, bəzi komandalar artıq minimum çəki həddinə çatıb, hətta ondan aşağı nəticə göstəriblər. Bu isə onlara əlavə balast yerləşdirərək bolidin balansını daha dəqiq tənzimləmək imkanı verir.
Digər tərəfdən, bir sıra komandalar hələ də normadan yuxarı çəki ilə mövsümə start verib. Xüsusilə “Aston Martin” və “Williams” komandalarının bolidləri ən ağır göstəricilərlə diqqət çəkir. Bu isə onların sürət və dövrə nəticələrinə mənfi təsir göstərə bilər.
2026 mövsümündə bolidlərin təxmini çəkisi:
- Mercedes – minimumdan aşağı
- Ferrari – minimumdan aşağı
- Audi – minimumdan aşağı
- McLaren – təxminən 768 kq
- Haas – +1 kq
- Alpine – +2 kq
- Racing Bulls – +4–5 kq
- Cadillac – +6–7 kq
- Red Bull – +9–10 kq
- Aston Martin – +9–10 kq
- Williams – +26 kq
Ekspertlər hesab edir ki, çəkinin azaldılması yalnız sürət deyil, həm də təkərlərin aşınması, yanacaq sərfiyyatı və ümumi strategiya baxımından böyük üstünlük yaradır. Buna görə də komandalar qarşıdakı yarışlarda bu sahəyə xüsusi diqqət yetirəcəklər.
