Azərbaycan Basketbol Liqasında pley-off mərhələsi davam edir və bu gün çempionluq uğrunda mübarizədə daha iki vacib qarşılaşma baş tutacaq. Günün oyunları turnirin gedişinə ciddi təsir edə bilər və komandalar üçün növbəti mərhələyə doğru mühüm addım sayılır.
Bu gün keçiriləcək 1/4 final qarşılaşmaları:
- 17:00 — “Abşeron Lions” – “Şəki”
- 20:00 — “Sabah” – “Naxçıvan”
Hər iki oyun Bakı İdman Sarayında baş tutacaq. İlk qarşılaşmada tərəflər seriyada üstünlük qazanmaq üçün mübarizə aparacaq. Axşam matçı isə xüsusi diqqət mərkəzindədir – son çempion “Sabah” növbəti mərhələyə yaxınlaşmaq üçün meydanda olacaq.
Dünənin nəticələri də gərginliyi artırdı
Ötən oyun günündə də dramatik qarşılaşmalar qeydə alınıb. NTD komandası “Neftçi” üzərində 97:94 hesablı qələbə qazanaraq üstünlüyünü nümayiş etdirib. Digər matçda isə “Ordu” ilə “Gəncə” arasında gərgin mübarizə yaşanıb və oyun 108:106 hesabı ilə başa çatıb.
Növbəti – cavab oyunlarının aprelin 16-17-də keçirilməsi planlaşdırılır və bu qarşılaşmalar seriyaların taleyini müəyyən edəcək.
