İtaliyanın “Roma” klubu rəhbərlik səviyyəsində mühüm qərar qəbul edib. Paytaxt təmsilçisi komandanın sabiq baş məşqçisi Klaudio Ranyeri ilə əməkdaşlığa son qoyulduğunu rəsmi şəkildə açıqlayıb.
Klubun yaydığı bəyanatda bildirilib ki, 74 yaşlı mütəxəssis artıq rəhbərliyin idman müşaviri vəzifəsində fəaliyyət göstərməyəcək. Xatırladaq ki, Ranyeri ötən mövsüm komandanı çalışdırdıqdan sonra məşqçilik karyerasını başa vurmuş və klub strukturunda qalmağa qərar vermişdi.
Münaqişə qərarın əsas səbəbi oldu
Son həftələrdə Ranyeri ilə hazırkı baş məşqçi Can Pyero Qasperini arasında münasibətlərin kəskinləşdiyi bildirilirdi. Məlumata görə, tərəflər arasındakı fikir ayrılıqları açıq qarşıdurma səviyyəsinə qədər yüksəlib və bu da rəhbərliyin mövqeyini müəyyənləşdirib.
“Roma”nın rəsmi açıqlamasında Ranyerinin xidmətləri yüksək qiymətləndirilib:
“Klub Klaudio Ranyeriyə göstərdiyi böyük töhfələrə görə təşəkkür edir. O, komandanı çətin dönəmdə idarə edib və onun zəhmətini hər zaman yüksək dəyərləndirəcəyik.”
Bununla yanaşı, klub gələcək planlarını da açıqlayıb və Qasperiniyə tam dəstək verdiyini vurğulayıb:
“Gələcəyə baxışımız aydındır. Klub sabit rəhbərliyə və konkret strategiyaya malikdir. ‘Roma’ hər zaman prioritet olacaq. Biz Can Pyero Qasperininin rəhbərliyi altında inkişaf və uğur yoluna tam inanırıq.”
Hazırda “Roma” İtaliya A Seriyasında 33 turdan sonra 58 xalla 6-cı pillədə qərarlaşıb və mövsümün sonuna doğru avrokubok yerləri uğrunda mübarizəni davam etdirir.
