Beynəlxalq Futbol Federasiyası (FIFA) 2026-cı ildə keçiriləcək dünya çempionatının ümumi mükafat fondunu 15 faiz artırmaq qərarına gəlib. Beləliklə, turnirin maliyyə vəsaiti rekord həddə – 871 milyon dollara çatdırılıb.
Təşkilatın Vankuverdə baş tutan şurasının iclasında qəbul edilən yeni qərara əsasən, iştirakçı komandaların qazanacağı məbləğlərdə ciddi artım müşahidə olunur. Yenilənmiş maliyyə planına görə, mundialda iştirak edəcək 48 milli komandanın hər biri üçün nəzərdə tutulan minimum qazanc 10,5 milyon dollardan 12,5 milyon dollara qaldırılıb.
Maliyyə bölgüsündəki digər dəyişikliklər isə aşağıdakı kimidir:
- Hazırlıq mərhələsi üçün ayrılan vəsait: 1,5 milyon dollardan 2,5 milyon dollara yüksəldilib.
- Təsnifat ödənişlərinin məbləği: 9 milyon dollardan 10 milyon dollara çatdırılıb.
- Subsidiya paketi: Nümayəndə heyətlərinin xərcləri və bilet kvotalarının genişləndirilməsi üçün əlavə 16 milyon dollardan çox vəsait ayrılıb.
FIFA-nın bu qərarı milli assosiasiyaların narahatlığını aradan qaldırmağa xidmət edir. Belə ki, xüsusilə ABŞ-də vergi dərəcələrinin yüksək olması və logistika xərclərinin artması səbəbindən bir çox ölkə turniri maliyyə itkisi ilə başa vurmaqdan çəkinirdi. Gəlirlərin qalan hissəsi isə quruma üzv olan 211 assosiasiya arasında futbolun qlobal inkişafı layihələrinə yönəldiləcək.
Tarixdə ilk dəfə 48 komandanın iştirak edəcəyi 2026-cı il dünya çempionatı ABŞ, Kanada və Meksikanın ev sahibliyi ilə 11 iyundan 19 iyula qədər davam edəcək.
